Nimina Serchhip Sub-Hqrs. YMA Co-ordination Committee (SCC) thukhawm chuan MYC Coaching Centre, Serchhip District-a hawn a nih theih nana hmalak chu Sub-Hqrs. YMA Executive Committee (SEC) bawhzui turin an dah.

Serchhip Sub-Hqrs. YMA Inkhawmpui dawta rorelna sâng, Serchhip Sub-Hqrs YMA Co-ordination Committee vawi 31-na, nimina an President Kawlthuama kaihhruaina hnuaia thukhawm chuan April ni 30, 2024-a Sub-Hqrs. YMA rorel inkhawmin an lo pawm tawh thu pawimawh hrang hranga hmalak dan tur an rel a, Sub-Hqrs. YMA rorel inkhawmin YMA khawih thurel a lo pawm tawh zingah ‘Covid hri leng avanga Sub-Hqrs YMA Inkhawmpui, kum 2020-a an neih theih tâk loh avanga Inkhawmpui hun kal dan buai ta siamthat leh nan nakum, 2025-ah Inkhawmpui nei loin, Rorel Inkhawm neih a, hruaitu ding laite term chu kum khata pawh sei nise, kum 2026 Inkhawmpuiah hruaitu thlanna neih ni se an ti a. Ramngaw, nungcha leh tuihna humhalh kawnga chak zawka hma lak ni se an ti a, a bawhzui dan tur chu SEC kutah dah a ni a, tuihna humhalh tha Branch YMA-te hnena lawmman pêk chungchang pawh SEC rel atan dah a ni a, Branch YMA chanchinbu enkawltu-te Training pek ni se tia Rorel Inkhawmin a lo passed tawh chu SEC kutah bawhzui leh ruahmanna siam dah a ni.

Sub-Hqrs. YMA rorel inkhawmin sawrkar khawih thurel a pawm zingah Chhiahtlang – Hmuifang Road, blacktop a nih theih nan chak taka hmalak ni se an ti a, Cadre Allocation Policy 2019 AGMUT Cadre-ah Mizoramin Cadre hran a neih ve theih nan sawrkar official-te dawr nise an ti a, raltlante khuahkhirh leh enkawl kawngah CYMA thuchhuah zuiin SEC-in ruahmanna lo siam se an ti bawk. Ruihhlo ngaite enkawlna hmun siam ni se tia Rorel Inkhawmin a lo passed tawh chu sawihoin, sawrkarah thlen ni se an ti a, Kikawn – Lungpho Road, Jeepable Road chu changtlung zawka siam a nih theih nan SEC-in sawrkar thuneitute lo dawr se an ti bawk.

Sub-Hqrs YMA Co-ordination Committee-ah hian Sub-Hqrs hnuaia Group pathum aiawhte leh Branch aiawh mi 50 kal khawmten ro an rel a, nimina rorelah hian Central YMA leh Sub-Hqrs. YMA Budget-te chu July, 2024 ral hmain pek kim ni se an ti a, CYMA Budget hi mahni remchan dan anga direct-a CYMA-a lo zu pe mai loin, SYMA kaltlanga pek theuh ni se an ti bawk.