LAD Minister, C.Lalsawivunga hoin nimn khan party hrang hrang leh khawtlang hruaituten VC dan awmlai siam thatna tur, The Mizoram (Village Councils) Bill 2024 chungchang New Capital Complex (MINECO) Secretariat Conference Hall, Aizawlah an sawiho.

Sawihona kaihruaitu LAD Minister chuan The Mizoram VC Bill 2024 chungchanga ngaihdan leh rawtna siam tura kal zawng zawngte chungah lawmthu a sawi a, VC-te tha tichak a, khawtlang inrelbawlna changtlung zawk a awm theih nana an ngaihdante sawi turin a sawm a ni.

Meeting-ah hian VC-te chu The Lushai Hills District (Village Councils) Act 1953 hnuaia inenkawl an la ni a, he dan hi a hlui tawh avang leh khawtlangin a mamawh tawh lem loh a tam bakah thil thar belh tur leh tihdanglam tur a awm tawh avanga he VC Draft Bill 2024 hi lo irhchhuak a nih thu tarlan a ni a, VC member a hmeichhe reservation leh VC term rei zawng chungchang sawiho a ni bawk.

He draft bill, The Mizoram (Village Councils) Bill 2024 chungchang inrawnkhawmnaah hian VC member-te tam zawng hi in behchhan (household based) ni loin, mihring tam dan behchhan (population based)-a kalpui tawh ni se an duh thu te, VC Secretary atan hian sawrkar hnathawk angin a hranpaa lak (special recruitment) awm thei se an duh thute sawiin, VC thiah hun, thiah dan leh an hnathawh tur bakah an thuneih dan turte sawiho nghal a ni bawk.

He dan hi Assembly-in a pass hunah Municipalities, Lai, Mara, leh Chakma Autonomous District Council huam loin Mizoram pumah hman tur a ni dawn a, nimina thutkhawmah hian member-te’n ngaihdan leh duhdan an neih te sawi vek sen a nih loh avangin LAD Secretary hnenah an ngaihdante ziaka thlen a, Drafting Committee-in a khaikhawm atan tih a ni a, chumi atanga thla khat hnuah thutkhawm leh nise tih a ni bawk.

Nimin thutkhawmah hian Lalmuanpuia Punte, MLA, Advisor to CM (Political) pawh telin, ani bakah hian Political Party aiawh hrang hrang BJP, Congress, MNF, bakah MUP, Central YMA, All Mizoram VC Association, khawtlang inrelbawlna lama mithiam Pensioners aiawhte, Drafting Committee Member, LAD Secretary bakah LAD Dept. Official-te an tel a ni.