Vantawng Group YMA leh Thenzawl Joint YMA tangkawp buatsaihin nimin khan Thenzawl khaw chhunga lui luang Lau lui thenfai hnatlang neih a ni.
Lau lui thenfai hnatlang hi nimin chawhma dar 9:30 atanga khan Lothazawl atangin bul tan a ni a, he hunah hian Vantawng Group YMA President C.Lalnunthara chuan YMA-in Lau lui thianfai tura hnatlang a koh chhan a sawi a, Lau lui hi a lo thianghlim zawk a, Thenzawl khaw timawitu a lo nih theih nan te, tuihna tha zawk a awm zel theihna turin YMA-in ruahmanna an siam thu a sawi a, Vantawng Group YMA chuan Lau lui hi chei thaa tichangtlung zel tura hmalak an tum thu pawh sawiin, Bialtu MLA leh Chief Minister ni bawk Lalduhoma pawh hmuin, an hmalakna chungchang hi sawipui an tum tih a sawi.
Lau lui thenfai hnatlang ah hian Vantawng Group YMA hnuaia Branch YMA hrang hrang bakah Then-zawla Higher Secondary School leh High School hrang hrang atangin zirlai naupang thahnem tak an thawk chhuak a, an zavaiin mi 600 vel an hnatlang a, lui a bawlhhlawh an thenfai mai bakah hian lui kam a hnimte pawh an samfai nghal a, hnatlang a chhuakte mamawh apianga hman turin Thenzawl East VC-in Rs.10,000/- an pe a, mimal inphalte hnen atangin pawisafai leh a tula hman tur lirthei a thlawnin an thawhchhuahpui bawk.