Mizoram Chief Information Commissioner (CIC), John Neihlaia chuan veng tina Local Council Chairman leh khaw tina Village Council President-te chu RTI hnuaia State Public Information Officer atan kum 2023 August thlaa sawrkar thuchhuakin a nemngheh thu leh Municipal Commissioner bakah district tina DLAO-te chu a khaikhawmtu an nih thu a sawi.
He thu hi nimina Aizawl Vanapa Hall-a Mizoram Information Commission-in Local Council-te puala RTI Act 2005 leh The Mizoram RTI Rules inzirtirna huna buatsaihah sawiin, CIC chuan Local Council-te chu veng mipui thlan tlin, mi puitling tak, vengchhung mipuite’n harstana an neiha an tluk luh thinna an nih thu a sawi a, dân hmanga langtlang taka rorel a nih theihna atan veng tina Local Council-ten pawimawhna nasa tak an nei, a ti.
John Neihlaia chuan RTI dan chu khawvel huap ang pawh a dan tha pawl tak a nih thute leh India rama RTI dân zam a nih theihna atan mi thahnem ngai tak takten chaw an nghei mai bakah nawrhna an huaihawt thute a sawi a, India ram chu British dan zam rochun zel ram a nih angin sawrkar kalphung pawh a mi nawlpui tan hriat a harsat thin thu leh chung dan awm sate chu RTI-in nasa taka a rawn thiah thu a sawi.
Mizoram Information Commission hi kum 2006 June thla a din a ni a, thawktu 30 an awm mek a, a din atanga kum 2024 June ni 7 thlenga RTI dan hmanga zawhna 30069 a awm thu leh complaint 464 a awm a, Online kaltlanga RTI zawhna pawh kum 2022 July thla atanga India rama a pariatna atan Mizoram Information Commission-in a tlangzarh a ni.
He hunah hian Information Commissioner Mang-jangam Touthang leh Mizo-ram Information Commission Secretary H.Dolian-buaia-te pawh an tel a ni.