Sawrkar hnathawh fake account hmanga conduct rules bawhchhiate ûmzui zel an ni dawn:Chief Minister
Chief Minister Lalduhoma chuan sawrkar hnathawk social media lama hming lem invuaha conduct rules bawhchhia an awm chuan an ûmzui zel dawn tih sawiin, confidential document thehdarh chenin pumpelh a ngai tih a sawi a, sawrkar hnathawk semrual dan pawh an dap mek tih sawiin, allocation of business pawh siamthat an tum thu a sawi.
Nimin khan Chief Minister ho hian Dawrpui Multi Purpose Hall-ah Inter-Departmental meeting neih a ni a, hetah hian Minister te, Advisers to CM-te leh Mizoram sawrkara Jt. Director chin chung lam zawng zawng leh DC leh SP zawng zawngte an tel a ni.
He hunah hian Lalduhoma chuan kalphung thar, mipui sawrkar din tum an ni tih sawiin, hemi kawngah hian sawrkar hnathawkte chu sawrkar ruhrel (steel frame of Mizoram) an ni a, thinlung hrisel tak pu chunga tun hmaa an lo tih theih ngai lohte pawh ti thei a, a tha zawnga kan ram thlak thleng thei nih tum tura a duh thu a sawi a, tuna kan kal mek dan aia tha zawka kal dan tur hriate chuan ziakin a hnenah thlen turin a chah a ni.
Chief Minister chuan Mizoram First tih chu an thupui a nih thu sawiin, “Thil tha lo hnawl ngam, a tul huna “No” ti ngam kan mamawh che u. Mipuite rawngbawltu kan nih angin an tan awlsamna kan chhawpchhuah thiam a ngai a. Lang tlang sawrkar neih ngei kan duh a, conduct rules leh dân kan zawm ngaite zawm chungin sawrkar policy ah kan rinawm tur a ni. Thuruk vawn ngaite kan vawng ang a, dân chunga leng tumah kan awm loh avangin hnathawktuten tha takin dan kan zawm theuh dawn nia,” a ti.
Lalduhoma chuan “Kan sawrkar hian mipuite aw ngaihthlak zel a duh avangin “Mipui Aw” online kan nei a; CM office atangin kan lo vil reng a, a mawhphurtuten tha takin lo kalpui ang che u. Eirukna tihbo kan duh a, sawrkar hnathawk leh consultancy firm inthurual te, supplier thurualpui neihte hi eirukna bul a ni fo, kan khauh hle dawn. Sawrkar hnathawkten Annual Property Returns a hun takah file ngei ngei tur a ni a, a tel loin vigilance clearance kan pe dawn lo,” a ti a, hnathawh quality tha chauh neih an tum avangin Project Monitoring Committee chak tak an nei tih a sawi a, project zawng zawng hi CM Dashboard hmangin an endik (monitor) vek tawh dawn a, tumah inthlahdah theih a ni dawn tawh lo a ti a, hna reng reng Administrative Approval, Expenditure Sanction leh Work Order awm loin tuman lo thawh tawh loh tur a ni tih sawiin, chutiang ti an awm chuan sawrkarin a ûmzui loh tur thu sawiin, Departmental work reng reng a changtu Minister phalna la hmasa loa thawh phal a ni lo tih a sawi a, Department-ten eng project pawh kalpui tum se Planning leh Finance department kaltlang loa proposal thehluh phal a ni lo a ti.
K deposit-ah pawisa dah a tam em em a, kum 3 leh a aia upa k.deposit reng reng chu department-ten chingfel thuai tura a duh thu a sawi a, service inepna (rivalry) nasa lutuk chu hriat hrehawm an tih thu sawiin, hei thawhhona a tichhe nasaa an hriat thu a sawi bawk.
Hand Holding Policy kalpui tura inbuatsaih mek a ni tih sawiin, dawngtu turte hi beneficiary ti ve lo-in, business partner an ti dawn tih a sawi a, a hlawhtlin nan Line department-ten mawhphurhna sâng tak an nei dawn a, partner pawh duhsak bik nei loa a hlawhtling thei turte chauh thlan tur a ni tiin, sawrkar flagship policy kalpui dante pawh a tarlang a, heng bakah hian sawrkar duhdan thil pawimawh hrang hrang a sawi bawk.
He hunah hian Home Minister K.Sapdanga leh Minister dangte leh Adviser to CM-ten thu an sawi bawk a, hemi hnu hian official kal khawmte nen inkawmhona an nei zui a ni.
Inkawm khawmna hi Pratap Chhetri, Deputy Director, I&PR chuan a host-a, kal khawmte lawmna thu Dr. Renu Sharma, IAS, Chief Secretary chuan sawiin, sawrkar thar duhdan leh hmalakna te, a ruahmanna tlangpuite a sawi a, sawrkar hnathawk kal tura beiseite tha taka an kal avangin lawmthu a sawi a ni.