Nimin khan Serchhip Town Development Committee (STDC) member-te chuan Chief Minister Lalduhoma chu a office-ah hmuin, Serchhip khawtlang hmasawnna tura an ngaihdan hrang hrangte an thlen.

STDC member 14, an chairman Rozamliana, President, Serchhip ZPM Block President hoa Chief Minter an hmuhnaah hian Serchhip khawtlang hmasawna tur hrang hrang an thlen a, CM hnena an thlen zingah Leisekawt field tihzauh zel a nih theih na tur atana 2nd phase-a hma laksak tura ngenna te, Nursing School hawng tur leh a building hmang tangkai tura ngenna te, NH-54 siam mekah Kikawn to Sailiam kawng tizau ve tura ngenna te, Kawlri tlanga Eklavya Model Residential School panna kawng te, Serchhip District Jail tihchangtlun dilna te, Supply Godown chu Chhiahtlang daia Supply godown sak tawha sawn chhuak tura dilna te, Chhiahtlang daia ITI Office building sak tawh hawnga a taka function tura ngenna te, Bukpuia Social Welfare Department Office function tura ngenna te, Sailiamkawna MIZOFED filling station dah a nih theih nan 132 KV line sawn tura hma laksak tura ngenna te bakah AOC Veng Soil & Water Conservation Department quarter ram leh Serchhip Venglaia PWD hmun tangkai zawka hman dan turte an an thlen a ni.

Chief Minister chuan STDC-tena an thu thlente chu tha tak bawhzui a tum thu a lo hrilh a, Chief Minister chuan District Jail sak that nan hian SASCI-ah cheng nuai 330 dah a nih tawh thu leh District Jail pariat lai sak \hat tura hmalak mek a nih thu a lo hrilh a, Paraglyding thlawh chhuahna (Take off point) panna kawng PCC turin teh mek a nih thu leh, World Cup thlen hma ngeia zawh tur a tih a nih thu a lo hrilh a, Serchhip District Hospital sakna tur cheng vaibelchhe 21-in a daih lohna bak chu CSR Fund dilna tur a hre tawh tih sawiin, sum sen ngai zat tur hriat chian a nih hunah dilna a thehluh tur thu a sawi a, Hospital building thar tur hi a design siam that leh mek a nih thu leh, District Hospital-a Ultrasound chhia chu thlak tura tih mek a ni tih a sawi a, Serchhip chu District zinga Press Club nei chhe ber a nih tawh avangin Press Club sakna tur pawh ngaihtuah a nih tur thu sawiin, Serchhip Sub-Hqrs MHIP-ten Golden Jubilee lawmna atana sum an dilah pawh cheng nuai 2 a pek tur thu a sawi bawk.