India chuan an captain Sunil Chhetri-a’n ram tana a match khelh hnuhnunna berah nizan khan 2026 FIFA World Cup qualifier-ah Kuwait chu goal awm loin an draw.
Nizana India a chak zawh loh avang hian World Cup qualifier-a third round thlen a khirh dawn a, group match khat chiah khelh tur a awm tawh a, tunah hian Qatar chuan point 13 neiin an group atangin an tling chiang tawh a, India hian point 5 neiin dawt mahse, an hnuai chiahah hian nizana goal awm loa Qatar draw-tu Afghanistan chu point 5 bawk an nei a, goal difference-ah India hian -3 an neih laiin Afghanistan hian -10 an nei thung a, an inkhelh tawh tum hnihah an in-draw ve ve a ni.
A mawng bera awm Kuwait chuan point 4 neiin, goal difference-ah -1 an nei a, an inkhelh hmasakah India lakah 1-0-in an lo tlawm tawh a ni.
An match hnuhnung berah June ni 11 khian India chuan Qatar an hmachhawn dawn a, hemi ni vek hian Afghanistan leh Kuwait-te an inkhel dawn bawk a, India hian Asian champion Qatar hi an hneh thei a nih chuan an tling chiang dawn a, an chak zo lo a nih erawh chuan Afghanistan leh Kuwait inkhela a chak zawk zawk emaw, an in-draw a nih chuan Afghanistan an tlang ang a, an in-draw a, India-in Qatar an draw thei a nih chuan India hi an tlang ve thei bawk a ni.
Nizana an match kha India tana khel tam ber leh goal thun tam ber, an captain Sunil Chhetri-a’n ram tana a khelh hnun ber tur a ni dawn a, kum 39 mi, Sunil Chhetri hian kum 19 a nihin ram tan a khel tan a, ram tana a khelh chhungin match 151 a khel a, goal 94 thunin, khawvelah ram tana goal thun tam palina a ni a, a chungah hian Cristiano Ronaldo (128), Iran legent Ali Daei (108) leh Lionel Messi (106)-te chiah an awm a ni.