Chief Minister Lalduhoma chuan, “Kan ramin hma a sawn theih nan theihtawp kan chhuah dawn a, a taima leh tumruh apiangten sawrkar atanga hamthatna awm theite an hui lût mai dawn a ni,” a ti.
Nimin khan Tualpui khawtlang chuan Tualpui Mual Zawlah an khaw chhuak Lalduhoma, Chief Minister chawimawina hun an hmang a, he hunah hian Lalduhoma chuan thu sawiin, “Kalphung hlui kalsanin kalphung tharah kan lût tan dawn a, kan ramin bung thar a kai dawn niin kan hria a, mipui leh sawrkar hnathawk zingah thil tha duh tam tak an awm tih kan hria, kan ram hi thang leh thar lo awm zel tur tana chenna tlak leh ei leh bara intodelh turin theihtawp min chhuahpui turin hmun hrang hranga Zohnahthlak mipuite ka sawm a ni,” a ti.
Chief Minister chuan Tualpui khua chu kum 118 a ni tawh tih sawiin, “Hemi chhung hian harsatna chi hrang hrang kan hma-chhawn nasa em em a, hemi chhunga min kaihhruainaah Pathian hnenah chawimawina kan hlan tur a ni. Tualpui khua hi kan chhungkaw chungah an tha em em thin a, tun dinhmun ka thlen thleng hian lawmpuina tam tak he khawtlang hian min dawntir tawh a ni,” a ti.
Chief Minister hian Tualpui khawtlangin an khaw tan chauh ni lo, ram pum leh bial huapa inang tlanga hmasawnna hna thawh an duh tih an sawi chu a ropui hle a ni, a ti a. Kalkhawmte chu Tualpui khua tihmingchhetu ni lo tur leh Tualpui khaw hmingthatna – buh ngah, hlo thlawh chak leh taima khua an nihna chhawm nung zel zawk turin CM hian a chah a, mimal, chhungkua leh khawtlang min runtu ruihhlo laka fihlim theuh turin a ngen bawk.
Chief Minister hian School Education Minister Vanlalthlana thilpek – ‘Smart Board’ chu Tualpui High School hnenah a hlan a, Tualpui Primary leh Middle School Building-te chu sak that an nih tur thu sawiin, zirtirtu indaih lohna pawh phuhruk thuai an tum tih a sawi. Hei bakah hian CM hian Health Minister Lalrinpuii aiawhin Tualpui Health & Wellness Center hnenah damdawi engemawzat a pe a, Tualpui khaw power lakluhna 11Kv line thar siam nan P&E Department hnuaiah cheng nuai 113.94 an ruahman thu pawh a sawilang bawk.
Chief Minister hian he hunah hian lehkhabu pahnih C.Laizawna ziah ‘Nunhlui Ngaihawm’ tih leh C.Sangthuama ziah ‘Tualpui Chanchin’-te a tlangzarh a, Adviser to CM, Champhai North bialtu Er. H.Ginzalala chuan Chief Minister lim a hawng a ni.
Chief Minister hi minister leh MLA bakah sawrkar hotu pawimawh tak takte leh ZPM party hotu engemawzatin an tawiawm a, PHED Minister Prof. Lalnilawma chuan Tualpui khawtlang tui mamawh phuhru turin cheng vaibelchhe 5 chuang man ruahmanna (proposal) an thehluh tawh thu a sawi lang bawk.