Sub-Headquarters YMA, Serchhip leh Vantawng Group YMA hruaitute chuan nimin khan Thenzawla Sangha dahna tur Brood Bank hnathawh mek chu a hmunah kalin an enfiah a, he hna thawh mek hi a tha tawk loa hria-in Mizoram State Project Monitoring Committee-ah thlen an tum.
Sub-Hqrs. YMA, Serchhip hnuaia Committee pêng pakhat, Vigilance & Monitoring Committee leh Vantawng Group YMA hnuaia Vigilance & Monitoring Committee-te tangkawp chuan nimin khan Thenzawla sangha pui dah khawmna leh siam chhuahna ‘Fresh Water Fish Brood Bank’ siam hna thawh mek chu a hmunah an tlawh a, helai hmuna hnathawh tawhte uluk taka enkualin, tun dinhmuna hna thawh tawh chin chuan duhthu a sam lo hle-in, a tha tawk lo niin an hria a, sangha dahna tur dil (Pond) hrang hrang siam tawhte bakah, Construction Work dangte chu RTI hmanga zawhna chhanna an dawna tarlan a nih dan, Estimate Amount cheng nuai 380 (Rs.38,000,000.00) atanga chhûtin he hna hi a tha tawk lo niin an ngai a ni.
‘Fresh Water Fish Brood Bank’ Thenzawl Fish Farm-a hna thawh mek hi hei aia tha zawka thawh chhunzawm a nih theih nan Sub-Headquartes YMA, Serchhip Vigilance & Monitoring Committee leh Vantawng Group YMA hruaitute chuan uluk zawka vil chhunzawm zel an tum a, tun dinhmuna an lungawi lohnate pawh Mizoram sawrkarin sawrkar sum hmanga Project thawhte viltu tura a din, Mizoram State Project Monitoring Committee hnenah thlen ni se an ti bawk.
RTI hmanga zawhna chhânna atanga a landanin ‘Fresh Water Fish Brood Bank’ Thenzawl hi Estimate Amount chu cheng nuai 380 niin, Departmental Work-a thawh a ni a, PMMSY Nodal Officer (Assistant Director of Fisheries) leh Department Junior Engineer (JE)-in an vil a, hna tan atanga thla 12 chhunga zawh hman tura ruahman niin, July emaw August thlaah zawh theih beisei a ni a, he hnathawhna tur sum hi Pradhan Mantri Matsya Sampada Yojana (PMMSY) atanga lo kal a ni.
Nimina ‘Fresh Water Fish Brood Bank’ Thenzawl tlawhnaah hian Sub-Hqrs YMA, Serchhip President, Kawlthuama leh Vantawng Group YMA President, C.Lalnunthara bakah an thawhpui mi thahnem tak an tel a ni.
Serchhip Sub-Hqrs YMA hnuaia Committee pêng, Vigilance & Monitoring Committee hian nimin vek khan Serchhip Chanmari Veng-a DIET Hostel sak lai chu tlawhin, DIET Hostel, tun thlenga sak zawh a la ni lo chu Chief Minister, Bialtu MLA ni bawk hnenah thlen an tum tih an sawi.