Nimin khan Congress Party chuan Congress Bhavan-ah ‘Friday Political Session’ an hmang a, he hunah hian MPCC Sr. Vice President leh Chief Secretary hlui, Lalnunmawia Chuaungo chuan thu sawiin, “Union Home Minister-in ‘Assam Rifles-te sawnna tur MOU ziah tawh kar khat chhunga chinfel tum a ni tiin a rawn thawn’ an ti a, ka rilru khawih deuh a awm a, sawrkara ka awm ve lai khan MOU Draft kan thawn a, Central lam khu an ngawi hmiah a ni. Chutihlai chuan anmahni lam hian MOU tur lam hi an lo siam ve a, mahse ziakin min pe lo a, an draft ang chuan Loch House te, Quarter Guard leh Mandir-te hi chhuahsan an tum lo niin a lang a, Mizoram sawrkar atang chuan reminder AR leh Ministry of Home-te kan thawn thin a, chhânna kan hmu ngailo a ni,” a ti.
Lalnunmawia Chuaungo chuan, “July ni 4 khan CM hoa sawiho a ni a, hetah hian Minister 4 laiin an tawiawm laiin AR lam atang chuan IGP a tel a ni. IGP level nena sawiho tur chuan Chief Secreatry chin nena sawiho tur a ni a, a Protocol a awm a, sawrkar fuction-ah thil pawimawh a ni. Hetihlai hian CM chuan amah tawiawm tura Minister 4 Assam Riffles IGP dawr tura a hruai te hi tihdanphung a ni lo a, Mizoram sawrkar an timualpho a ni. Sawrkar anga indawrna ah IGP level Chief Secretary khan a lo dawr tur a ni a, chu chu international level thlengin an tihdanphung a ni. Kan Chief Minister pawh ka hrilh duh chu, a hnuaia office te dinhmun hetianga an tih hian a tihniam a ni.
“Union Home Minister in MOU hi a ram neitu Mizoram mipuite rawn lova a rawn finalise tur hi a dik lo a, sawiho a, state sawrkar nen an siam tur a ni. Mizoram sawrkarin acre 1007 lai a pe a, Assam Rifles-ten an luah sa mek hi acre 60 vel chauh a ni. Sawrkara ka awm ve lai khan Inchi khat pawhin chhuahsan turah hian in chang zui lo ang tih kha ka hrilh dan a ni. Chuvang chuan an MOU lo siam ve pawh min thawn lo an nih ka ring,” a ti.
Lalnunmawia chuan, “Hemi chungchang hi Mizoram interest a ni a, mipui interest a ni. Helaia Loch House te, Quarter Guard leh Mandir-te hi an chhuahsan duh lo a nih chuan chhuaklo mai se tih hi ka chah duh a ni,” a ti.
He hunah hian R.Vanlalvena, General Secretary leh Ex-MLA leh S.Lalrinawma, Secretary, MPCC-te pawhin thu an sawi bawk.