Nimin khan Serchhip DC Conference Hall-ah kum tling lo nau-pang/tleirawl hnathawka chhawr (Child Adolescent Labour) leh naupang hralha sumdawn (Child Trafficking) chungchang inzirtirna Sensitization Workshop chu nimin khan neih a ni a, Serchhipah child labour leh trafficking a awm leh awm loh enfiahin July ni 11 leh 12 hian rescue operation neih a ni dawn a ni.

Nimina he hun hmannaah hian khuallian Serchhip District Bawrhsap Paul L.Khuma chuan dân kalha naupang kumtling lo hna-thawka chhawr luih leh naup-ang hralha sumdawn (child trafficking) chungchangah Serchhip District-in tun thlenga case a la nei lo chu lawmawm a tih thu sawiin, chutihrual chuan hetiang thil hi kan chungah leh kan khawtlangah a thlen ve lohna tura tan lak a tul thu a sawi. Naupang kum tling lo hnathawka chhawr chung-changah tum reng vang ni lo, hriat lohna avanga dân kalha naupang hnathawk a chhawrte an lo awm thei, tih sawiin, India ram danin child labour a hrilhfiah leh a khap dan kalphung te, inkaihhruaina leh hremna awm theite inzirtir nasat a ngai hle a ti a, kan rinlohna lam atangin inbumna avangin Child Trafficking tuartu kan lo ni reng thei tihte hriain, fimkhur a ngai a, khawtlangah pawh inzirtir a ngai hle tih a sawi.

Child and Adolescent Labour (Prohibition and Regulation) 1986 chuan naupang kum tling lote an taksa leh rilru hriselna atana him lo eizawna hmuna hnathawka chhawr a khap a, naupang kum 14 hnuai lam te phei chu an zirna ti buai zawngin eng hna mah thawh phal a ni lo a. Hna reng reng naupang theihna leh zahawmna hlohtirtu emaw; naupang taksa leh rilru hmasawnna leh thanna dal thei tu emaw, an zirna tibahlah tirtu emaw, zirna chawlhsan ngai khawpa thawh ngai hnate reng reng khap tlat a ni a. Tleirawl te hi zan dar 7 atanga zing dar 8 inkarah inhlawhfaa chhawr phal a ni lo a, an taksaah danglamna leh hmasawnna la insiam mekte an nih avangin an hriselna atana pawi thei tur te, an nunna atana hlauhawm ang chi reng rengah inhlawhfak khap a ni a, chhawr lui an awm a nih chuan dan anga hrem theih an ni.
Mihring hmanga sumdawnna human trafficking hi khawvela organised crime hluar ber dawttu a ni a, human trafficking thleng zinga a tuartu za zela 27 hi naupang – child trafficking case a ni a, Mizoramah hian April 2019 atanga June 2024 chhung khan child trafficking case hi 23 (hmeichhia 10 leh mipa 13) a lût tawh a. Serchhip District-ah erawh child trafficking case hi a la awm lo a, Serchhip District ah hian Anti Human Trafficking Unit din niin, child trafficking case bik khawihtu tura ruat an ni a, training pawh vawi engemawzat an nei tawh a ni.

He hunah hian DC kaihhruaina hnuaiah Vigillance Team for Inspection and Monitoring on Prevention of Illegal Transportation of Children chu Serchhipah din a ni tawh a, he team hian July ni 11 & leh 12 hian Serchhipah rescue operation hi an nei dawn a ni.

Nimina he hun hmanna hi Additional DC Lalrinzuala’n kaihruaiin, Lalsiampuii, District Child Protection Officer leh Lalrinhlua, Advocate-ten zirtirna an pe a, sawrkar department hotute bakah bazar nuho te, workshop neitute, VC leh khawtlang hruaitute, NGO hrang hrangte leh chanchinbumite an tel a ni.