Nimina Sub-Hqrs. YMA Serchhip Coordination Committee thukhawm chuan Sub-Hqrs. YMA Rorel Inkhawm vawi 5-naa an thurel hrang hrangte bawhzui dan tur an duang.
Nimina an thurel zingah ‘Ruihhlo do kawngah Sub-Headquarters YMA hnuaia Branch tinten nasa zawk a hmalak ni rawh se’ tih leh YMA Chhang pualin Mizo hnam lam leh infiamna Kutpui Sub-Headquarters YMA in buatsaih rawh se’ tih chungchangahte SEC-in ruahmanna siam turin thu an dah a, ‘Aia upa zah kawngah YMA member-ten hma kan sawn zel theih nan Sub-Headquarters YMA-in hma la rawh se’ tih chu kumina YMA Day lo thleng turah Branch tinten ‘Aia upa zah’ tih chu thupui pakhat-a hmangin thu sawi nise an tih bakah, Branch YMA ten Khawhar In-a hun an hman thinah pawh hemi chungchang hi sawi ngei thin nise an ti a, hei bakah ruahmanna siam ngaite chu SEC-in lo ruahman se an ti bawk.
Sawrkar khawih an thurel zingah ‘Industrial Training Institute (ITI) Bukpui hi mumal taka a function theih nan Sub-Headquarters YMA-in hmala rawh se’ tih chu chak taka hma la turin sawrkar hnenah thlen nise an ti a, building-te a him zel theihna turin Bukpui Branch YMA-ten hma lain lo enzui se an tih bakah SEC-in May 17, 2025 (Inrinni) khian a hmunah tlawhin enfiah nise an ti a, ‘Thenzawl to Zote South inkar kawng PCC chhun tawh hi Alkatra hmanga metal (Seal Coat) a nih theih nan hmalak ni rawh se’ tih chu sawrkarah hma la ngei tura thlen nise an ti bawk.
Hei bakah hian Sub-Hqrs. YMA Budget (2025-2026) leh Central Budget (2024-2025) te chu Branch leh Group ten July 2025 ralhma-in Sub-Hqrs. YMA Office-ah pek tlak hman nise an ti a, Rorel Inkhawma palai kal an tlem chungchangah Branch tinten tan tan lak a ngai hle nia an hriat thu an sawi bawk.