NH-06 leh 306, Kawnpui leh Sairang inkar kawng a chhiat lutuk avangin Mizoram Tipper Association (MTA), Kola-sib District Hqrs. chuan Ningani khian hnatlangpui an ko a, kawng chhe zual laite chu lirthei veivakten lungmuang taka an zawh theihna tura hnawh a nih hma chuan hemi ni atang hian tiamchin awm loin lirthei eng chi mahin he kawng hi zawh lo turin an ngên tih an sawi a, zawh lui an awm a nih chuan an chungah harsatna engpawh thleng se MTA chuan mawh a phur lo ang, an ti.
Mizoram Tipper Association (MTA), Kolasib District Hqrs hruaitute hian nimin khan Kolasib MJA Press Club-ah thuthar lakhawmtute kawmin, kawngpui chhia siamthat hnatlangpui neih an tum thu hi an puang a, Mizoram châk lâkna kawngpui Kawnpui leh Sairang inkar kawng chu a chhiat tawh avanga Kolasib DC hnenah rawtna an thlen tawh chu bawhzuiin, ni 19 khan MTA hruaitute kaihhruaina-in Kolasib leh Sairang inkar kawngpuia Mizoram PWD & NHIDCL-te hnathawh dan a hmunah an enfiah tih an sawi a, an hnathawh hi a chak loin an thawk muang hle an ti a, lirthei tana zawh hlauhawm leh chhiatna nasa zawk thleng thei dinhmunah a awm mek a, tunah pawh lirthei khalhtute leh neituten harsatna namen lo an tawk mek tih an sawi. Hetiang a ni chunga rit phur chunga he kawng zawh luih hian motor chhiatna leh Oil manah sum sen a tam phah a, hei hian Motor hman man a tisâng thin a, a tuartu chu mipuite an ni, an ti.
MTA hruaituten an sawi danin kawng siam hnatlangpui an neih tur chu Mizoram Truck Owners Association Hqrs., Mizoram Truck Drivers Association Hqrs, Mizoram Oil Tanker Drivers Association, Mizo-ram Indane Drivers Association, Kolasib District Vehicle Owners & Drivers Association JAC leh lirthei enkawltu pawl thenkhatin an thlâwp a, harsatna dang a thlen loh nan Kawng siam hnatlangpui an neih ni hian phai lam atangin ni tin lirthei lian an rawn tlan luh loh nan Silchar Truck Drivers Association hruaitute hnenah ngenna an thlen tawh thu an sawi bawk.