Agriculture & Horticulture Farmers’ Co-operative Society Serchhip chuan Myanmar atanga raltlânten an duh duha nûl/lo an siam ve chu tha lo an tih thu an sawi.
Nimin khan Serchhip Darnam YMA Hall-ah Agriculture & Horticulture Farmers’ Co-operative Society Serchhip chuan Annual Assembly vawi 12-na hmangin, an chairman Lalramthara kaihhruaia ro an relnaah Serchhip Zawl-pui phaia ram neitu thenkhatten Myanmar raltlan thenkhatte an duh duha zalen taka nûl an siamtir ve thin leh an thlai hlâwkna tur chauh ngaihtuah a thlai tana hlo tha lo pawh hman mai an hreh lo nia an hriat chu thuneituten tihtawpsak vat se an duh thu an sawi a, Serchhip Bialtu MLA-in MLA Fund atanga thlai chi a pe thin chu lawmawm an tih thu tarlang bawkin, kumin atan pawh thlai chi an mamawhna a sân leh thute an tarlang bawk a ni.
An assembly hun hnihna hi Serchhip District Co-operative Officer C.Vanlahruaia chuan hmanpuiin, Society member hriattur pawimawh hrang hrangte a sawi bakah Society Member Assembly-a kalte chu bawngtuthlawh a sem bawk a ni.
Tun dinhmunah Agriculture & Horticulture Farmers’ Co-operative Society Serchhip hnuaiah hian member 200 vel an awm mek a ni.