Agriculture & Farmers Welfare Minister PC Vanlalruata chuan sawr-karin direct-a sawhthing a lâk zât chu Qtl. 94,160 a ni a, support price a pek zat chu Qtl. 1,21,740 a ni tawh a, June ni 21, 2025 thlenga sawhthing lâk tawh zât belh khawm chu Qtl. 2,15,900 zet a tling tawh a, sawhthing rate chhiat ber kumah pawh sawrkarin cheng vaibelchhe 85 chuang a seng tawh a ni, a ti.
Nimin khan ZPM party chuan an Party Office-ah chhung inkhawm an hmang a, he hunah hian PC Vanlal-ruata chuan thu sawiin, “Hun rei tak politics lo khel tawhte leh ram siam that duh avanga ZPM zawmtu-ten sawrkarna kan siamho a, tunah hian kan zavaia thawhrah kuthnathawktuten an tel mek a, mi hlui thawhrah bik a ni lo a, mi thar tih theih a ni bik chuang lo. Kan tanhona hian kuthnathawktute a ti lawm mek a ni,” a ti.
Agriculture Minister chuan, “ZPM sawrkar hi a lo din tirh atanga vawiin thlengin Zoram mipuite tan a ding reng a, ‘Sawrkar hnathawkten min dem mai ang’ tih hlau chungin aikal lâk kan titawp a. Sum leh pai tam tak sen a ngai dawn tih hre reng chungin thlai thar lei kan buaipui mek bawk a ni. Thlai thar lei chungchangah hian kan Chief Minister a fakawm tak zet a ni. Sum leh pai harsatzia leh sawhthing rate chhiat ber kum a ni tih hre reng chungin Kuthnathawk-tute tihbeidawn a duh lo a, a department changtu Minister ka nihna ang pawhin ka lawm tak zet a. Zoram kuthnathawktute lawmthu sawina pawh ngaihthlak a nuam hle a ni,” a ti a.
PC Vanlalruata chuan, “Hmunphiah chungchangah Empanelled Firm-ten sawr-kar rate anga lei turin an intiam a, an intiam anga an kal leh tak loh avangin kan bul tanna a fuh hlel deuh hlek a, chuti chung chuan ZOHANDCO kaltlangin kumin March thla chhung khan sawrkarin Kg. 2,49,828 a lei a, kum a lo thar ang a, hmunphiah ro chu grade sawi lovin sawr-karin a lei dawn a ni,” a ti.
Agriculture Minister chuan, “Sawrkar kal tawhte khan kuthnathawktute hi market chungchangah an lo vil zui na tawk lo deuh a, ZPM chuan thlai thar thlan bik pali neiin chungho chu a buaipui hna sawrkarin a thawk tawh a, a la thawk zel dawn bawk a ni. Heng thlai thlan bik mai ni lo hian Buhhûm pawh sawrkarin tam tak a lei tawh a. Sawhthing bikah hian Siliguri pêl loin Mizoten kan lo hralh nasa hle mai a, Bagha vai kan pekte pawh hian Siliguri thleng an phur a, chuta tang chuan buyer lianten an lo la chhâwng ve leh thin. Kumin atang chuan phai buyer lianten Mizoram sawhthing an hre chho tan ve ta hi a lawmawm hle. Kan ramah hian eng thlai hi nge kuthathawktute tan hmasawnna ngelnghet awm thei ang tih ka ngaihtuah thin. Tung hi phai lamah a rah tha thei lo a, Mizoram leilung hi a ngeih em em a, Tung han sawi mawi leh pawh a zahthlak deuh lek lek tawh chungin India hian Tung hriak a mamawhna hi a lo sâng em em mai a, ka bial chhungah hma kan la chho leh mek a ni,” a ti a, “Tunah Sapthei-ah pawh hma kan la chho mek a, kan Sapthei variety hi phai lam aiin hmun Zo lamah a tha duh a, grade A leh B-te thawn chhuah atan kan hralh ang a, grade C te chu thei tui siamnan kan process dawn a ni,’’ a ti a.
Minister chuan, “He sawrkarah hian mimal hamthatna tur leh hlâwkna ûm ringawtte tan hmun a awm lo a, kan Minister-te leh MLA-te zingah mahni tanghma hai ka hmu lo a, party mite pawhin Zoram damna tur hi thlir turin ka duh che u a ni,’’ a ti bawk.