Nimin khan New Delhi-ah Indian Council of Agricultural Research (ICAR) Society Annual General Meeting (AGM) vawi 96-na neih a ni a, he huna tel Agriculture Minister PC Vanlalruata chuan Lunglei, Champhai leh Saitual district-a Krishi Vigyan Kendra (KVK) din thuai a nih theih nana hma la turin Ministry of Agriculture & Farmers Welfare ah ngenna a thlen.
Meeting hi Bharat Ratna C.Subramaniam Auditorium, NASC Complex, PUSA-ah neih a ni a, union minister for agriculture & farmers welfare Shivraj Singh Chouhan chu chairman a ni. State/UT hrang hranga Agriculture leh a kaihhnawih Minister te, department officer te, Agriculture lama mithiamte leh loneitu pawl aiawh leh pawl hrang hrang aiawh tel a, PC Vanlalruata chuan Mizoram mamawh hrang hrang thlenin chung zingah chuan Agriculture-a ṭhalaite hip tura ruahmanna ṭha zawk siamsak tura ngenna te, Mizoram sik leh sa leh a ram leilung nena inmil tlang rama chin tur buh chi ṭha (high yielding upland paddy) siam chhuak tura hma la tura ngenna te pawh telin Mizoramin thlai chi ṭha zawk a neih theih nan ICAR chu hmalakpui turin ngenna te a tel a ni.
Heng bakah hian union minister for agriculture & farmers welfare hnenah hian College of Horticulture tihchangtlun nana mamawh hrang hrangte leh Mamit District-a Wet Rice Cultivation (WRC) nasa zawka kalpui a ni theih nana hma lak sak turin a ngen bawk. Minister hian vawiin hian union minister for agriculture & farmers welfare nen hian inkawmin Mizoram mamawhte a thlen ang.