Govt. Serchhip College Students’ Union chuan sawrkarin a tiam anga an College-a zirtirtu a dah belh loh avangin vawiin aṭangin zirlaite chuan badge dum bel chungin class an kal dawn.
Hemi chungchanga thuchhuah an siamah an College-a zirtirtu indaih lohna nasa tak an tawh avanga zirtirtu dahbelhsak tura an ngenna leh, kumin April ni 16-a an college campus paltlangtu vantlang kawng dang hial khawpa an thil phut tihhlawhtlinsak tura an nawrna chu Serchhip District Bawrhsap kaltlanga Higher & Technical Education Minister-in Academic Session thar ṭan hma ngeia chinfelsak a tiam angin dawhthei takin an nghâk tih an sawi a, July thla chawhnu lam thleng pawha sawrkarin zirtirtu dah belhsak chu sawi loh, an college-a Department of Political Science leh Department of Geography-a Casual Faculty post an neihsa pakhat ve ve chu an lâksak niin an sawi.
Sawrkarin a intiam anga Department of Computer Applications, Department of Geography leh Department of Zoology-a tun thlenga zirtirtu a la dah belh lo chu hriatthiam har an tih thu sawiin, college dangten an dil miah lo chunga zirtirtu pek belh an nih laia, Serchhip college-a academic department pahnih aṭanga zirtirtu post a laksak leh chuan a hma aṭanga zirtirtu indaih loh sa tawhna chu rawn belhchhahin, zirlaiten harsatna an tawh phah nasa hle tih an sawi a, hei vang hian Govt. Serchhip College zirlai-te chuan July ni 16, 2025, Nilaini aṭanga July ni 18, 2025, Zirtawpni thleng hian badge dum bel chungin class an kal dawn tih an sawi a, aan hmalakna hian awmzia a neih loh a, huntiam chhunga Sawrkar aṭanga thu lawmawm hriat tur a awm lo a nih chuan, a aia na zawkin hma an la chhunzawm dawn tih an sawi.
An thil phutte sawrkarin a intiam anga a tihhlawhtlin loh avanga hma an lakna ah na zawka hmalak a lo ṭul ta anih pawhin a nghawng tur zirlaite, zirtirtute leh khawtlang mipuite hriatthiamna dilin an ṭawiawmna leh thlawpna an ngen nghal bawk a ni.
Hetihlai hian nizan dar 6 pelh hnu khan sawrkar chuan Asst. Professor-te transfer order a tichhuak a, hetah hian Govt. Serchhip College-a awm turin Zoology Department-ah Lunglei Govt. College aṭangin Asst.Professor (Regular) pakhat a rawn sawn a, Geography-ah Govt. Aizawl North College aṭangin Asst. Professor (Contract) pakhat leh, Mathematics-ah Govt. Champhai College aṭangin Asst. Professor (RUSA) pakhat a rawn dah a, hetah hian GSC SU-in Department of Computer Application-a zirtirtu dah belh tura an phût a la tel lo a ni.
Hetihrual hian Mizoram College Teachers’ Association chuan Aizawl pawn lama College-a zirtirtu dah belh turah hian a ngheta thawk (Regular) kher dah an phût a, Aizawl College-ah an inbeng vak laia Aizawl pawn lama zirtirtu hnawhkhahna atana a nghet loa thawk, part-time, Casual leh contract-a thawkte dah an ni ṭhin chu an duh loh thu an sawi a, hemi chungchangah hian tukinah emergency OB meeting an nei dawn a ni.