Sawrkar kum kalta, 2024-2025 chhungin Serchhip District-ah HIV hrikpai mi 65 hmuhchhuah an ni a, an zinga pathum hi nu naupai an test aṭanga hmuh chhuah an ni.
Nimina Serchhip District AIDS Prevention and Control Committee (DAPCC) ṭhutkhawmnaah he thu hi tarlan a ni a, an Chairman Paul L Khuma, District Bawrhsap ni bawk hoa DC Pisapui Conference Hall-a ṭhukhawmnaah hian District Integrated Strategy for HIV and AIDS (DISHA) ngawrh taka kalpui a nih dan te, Serchhip DAPCC hmalakna leh hmachhawpte ngaihthlak a ni a, tleirawl kum 13 aṭanga kum 17 zingah HIV/AIDS leh mipat hmeichhiatna aṭanga natna inkaichhawn theihte a darh zel lohna tura theihtawpa ṭan lak a nih thute tarlan niin, an pual hian School Education Department-te nena thawkhoin Awareness Campaign ngawrh taka kalpui ṭhin a nih bakah, kuminah pawh Red Ribbon Quiz neih leh tur niin, Pawl 8, 9 leh 11 zirlaite zingah Quiz hi School, District leh State pum huapa neih tur a nih thu tarlan a ni.
Serchhip District chhunga Red Ribbon Quiz neih dan tur rel niin, mahni School ṭheuhah August ni 15-ah online-a neih a ni dawn a, District chhunga school 50 aia tlêm lo tel tura beisei an ni a, School tiṭha zual 10 thlan chhuahte chuan District pum huapa inelna an hmachhawn ang a, September ni 2 (Nilaini)-ah DC Pisapui Hall-ah neih a ni dawn a, heta tiṭhate hi Serchhip District aiawhin state pum huap inelnaah an tel dawn a ni.
He ṭhutkhawma tarlan a nih danin, sawrkar kum kalta, 2024-2025 chhung khan Serchhip District-ah HIV hrikpai mi 65 hmuh-chhuah an ni a, an zinga 3 hi nu naupai an test aṭanga hmuh chhuah an ni a, HIV hrik pai 65 hmuhchhuah thar zinga 50 hi mipa an ni a, 15 hmeichhia an ni thung a, mipat hmeichhiatna aṭanga kai leh hriau inhmanṭawm aṭanga kai hi mi 30 (48.38%) ve ve an ni a, hetihlai hian kum 2024-2025 chhung khan Mizoram pumah HIV hrik pai mi 2021 hmuhchhuah an ni a, heng zinga mi 110 hi nu naupai thisen endik aṭanga hmuhchhuah a ni a, mipat hmeichhiatna aṭanga kai hi 1302 (68.13%) niin, hriau inhmanṭawm aṭanga kai hi 559 (29.25%) an ni.
Nimin ṭhutkhawmah hian Serchhip SP Gavit Gogna bakah School Education Department, Health Department, I&PR Department leh official dangte an tel a ni.