Crystal Palace chuan Europa League aṭanga Conference League lama an paihthlakna chu duh lo-in, Court of Arbitration for Sport (CAS)-ah an khing let.
He an khinna hi hremna petu Uefa, French club Lyon leh Premier League-a an elpui Nottingham Forest-te lakah a ni a. The Eagles hi an hrem chhan chu club pakhat aia tam neih kawp khapna dân an bawhchhiat vang a ni a, American sumdawng John Textor-a’n he club-ah hian neitu chanvo (stake) a nei a, Europa League khel tura tling ve bawk Lyon-ah neitu chanvo nei tam ber a ni bawk.
Hremna hi tihdanglam a nih loh chuan Premier League season liam taa pasarihnaa awm Forest hian FA Cup champion Palace aiawhin Europa League an khelh beisei a ni.
An khin letnaah hian Palace chuan Uefa sum leh pai endiktu pawl (financial control body) thutlukna chu sut leh turin leh, Forest emaw Lyon emaw aiawha Europa League-a lâkluh leh an nih theih nan an ngen a ni.
Thutlukna chu August ni 11-ah emaw, a hma lamin emaw siam beisei a ni a, Europa League group stage hi September ni 24-ah khelh ṭan a ni dawn a ni.
European football thuneitu sang, UEFA chuan, mi pakhat emaw, pawl (entity) thuhmunin thuneihna a thunun theihna club-te chu European inelna pakhatah an tel kawp thei lo a ni. Uefa chuan Crystal Palace hnenah hian club neih kawp chungchanga an insiamṭha a ni tih finfiahna thehluh hun tawp atan March ni 1, 2025 kha a bituk sak a, hei hi Palace hian an bawhpelh a ni.
Palace chuan an club-ah Textor-a’n thutlukna siam theihna khawp thuneihna (decisive influence) a neih loh thu an sawi a, mahse Uefa chuan Premier League club insawifiahna hi a pawmsak lo thung.