Mizo Hnam Runah chhung inkhawm nimina neihah MNF Senior Vice President Dr. R.Lalthangliana chuan, “Kum 2017-18, GST dân hmanga chhiah lâk a nih atanga a vawi khat nan kum 2024-25-ah Mizoram GST lakkhawm a tlahniam duai a, Covid hunlai pawha la thleng ngai lo a ni. Kum tharah pawh ziaawm lam aiin a hniam zawngin kan kal chhunzawm zel. ZPM sawrkar hi Finance enkawlah a hlawhchham chiang hle. Sum pûk hi sumfai pawhin a tam a, GSDP percent atanga chhût pawhin Mizoram leiba san ber kum a ni,” a ti bawk.
Dr. R. Lalthangliana chuan, “GST hniam reng reng chu Finance Commission tangin sum an dawng tha thei ngai lo. Kan hun lai khan GST lakluh a pung nasa a, tuna GST tlahniam ta em em hi restricted tender leh departmental-a contract hna inpek a nasat vang pawh a ni thei,” a ti.
MNF Senior Vice President chuan, “India ram-a State leh UT zingah sum ruahmanna vaibelchhe 600 zet thehlut hmasa ber kan ni a. MNF sawrkar term hnih chhung khan tuna World Bank Road : Aizawl – Thenzawl – Lunglei Road hi kan peih hman a. Aizawl Bawngkawn atanga Durtlang kawng motor lian inpelh theihna tura siamtu kan ni. Multi-Modal Transit kawng zau tak siam chhuaktu kan ni bawk.”
“Aizawl – Seling – Serchhip – Hnahthial – Lunglei – Lawngtlai leh a piah lam thlengin Double Lane kan neih mekte hi MNF siam a ni bawk. Aizawl – Saitual – Khawzawl to Champhai tuna double lane hi MNF sawrkar kutchhuak a ni. Aizawl to Mamit, Kawrthah to Zâwlnuam, Kanhmun lam pawh MNF sawrkar hmalakna a ni. Aizawl to Sesawng – Darlawn – Sakawrdai – E Phaileng – to Suangpuilawnte pawh MNF hmalakna vek a ni,” a ti.
“Mizorama sawrkar building tha leh ropui zawng zawng hi MNF kutchhuak deuh vek niin, development lian tham zawng zawng hi MNF kutchhuak deuh vek a ni a ti.
Lalrintluanga Sailo, MLA chanchin sawiin, MNF NCC ni lai, MNF term kal taa Dy. Goverment Chief Whip, a boral ni thlenga MNF Legislature party Deputy Leader a ni a, naupangte a nih lai atanga Mizoram zalenna sualtute zingami, a boral ni thlenga Mizo Nationalism nunpuitu leh midangte tana thil phal em em-in a awm loh san ta chu MNF tan channa nasa tak niin, MNF chuan ui takzet a ni a ti bawk.