Chief Minister Lalduhoma kaihhruai Empowered Committee on Investment chuan Mizorama sawhthing sawngbawlna hmun (processing unit) din duh dilna thehlût zinga company palite dilna an pawmfel.
CM Conference Hall-a nimina thukhawmin an pawmte hi – Sjar Consulting Private Limited, Noida, UP, anmahni sum cheng vaibelchhe 38 thleng invest theia insawi, mi 200 aia tam chhawr thei tura inngai te, Opickpure Organic Pvt. Ltd. Kangra, Himachal Pradesh, anmahni sum cheng vaibelchhe 2.5 sênga bul tan theia insawi, hnathawktu mi 50 vel thlenga chhawr thei tura inngai te, AV Biotech, Bikaner, Rajasthan, cheng vaibelchhe 13. 95 vel senga bul tan a, mi 100 vel thleng chhawr thei tura inngai te leh Lushai Organic, Mizoram, cheng vaibelchhe 1 vel senga bul tana mi 20 vel chhawr thei tura inngaite an ni.
Heng company-te inbun tur chungchang hi tihfel kim a la ni lo deuh a, rang zawka thutlukna siam a nih theih nan Special Investment Committee din a ni a, anni hian company-te be chungin an inbunna tur hmun te, draft MoU te, company-ten sawrkara mamawh an neih ram, power leh tui chungchang thlengin an lo bawhzui ang.