Nimin khan Information & Public Relation, Printing and Stationary Department changtu Minister Dr. Vanlalthlana chuan I&PR Conference Hall, Lianchhiari Run, Aizawlah, nikum leh kumina Mizoram Journalists’ Association (MJA) member boral ta chhungte hnenah sawrkar ralna thilpêk (ex-gratia) a hlân.
He hunah hian khuallian Dr. Vanlalthlana chuan lusun chhungte chu a tawrhpui tak zet thu sawiin, sawrkar ang pawhin Chanchinbumite pawimawhna leh ram leh hnam tana an hlutnate chu an hre reng tih vawng tlat turin a chah a ni.
MJA member boral, an puala nimina sunna hun hmante hi – Lalhmingmawia Pachuau, Pasaltha Daily Chanchinbu Editor, Champhai (ni 21-11-2024-a boral), Johan Lalhmunmawia, News Stringer, DDK, Lunglei, (Ni 02-12-2024-a boral), H.Lalngaihawma, Hnehtu Daily Newspaper Editor, Aizawl (ni 23-03-2025-a boral) leh TC Lalmuankima, Correspondent, RNU, AIR, Aizawl (ni 23-12-2024-a boral)-te an ni.
Sawrkar chuan accredited Journalist boralte chu 1,50,000 leh non-accredited Journalist boralte chu1,00,000/-in a ral a ni.
Nimina hun hman hi IPR&PS Department Secretary Betsy Zothanpari Sailo chuan a kaihruai a, MJA member boral tate sûnna pualin minute khat chhung ngawi renga dinga hun hman niin, ralna thilpêk hlanna neih nghal a ni a. MJA President, C.Lalrambuatsaiha’n MJA member boral tate chanchin tawi sawiin, mitthi chhungten thu an sawi bawk a, I&PR Director C.Lalnunkima’n lawm-thu sawiin hun a khar a ni.