Dampa bialtu MLA Lalrintluanga Sailo, kum 65 chu zanin (21.7.2025) dar 9 vel khan Max Hospital, New Delhi-ah a boral.
Lalrintluanga Sailo hi khawsik nasat avangin June ni 29, 2025 khan New Delhi-a Max Hospital panpui a ni a, ward pangngaia ni khat enkawl a nih hnuah ICU-ah dahluh a ni a, rannung seh (scrub typhus) a ni tih hmuhchhuah a ni a, hun engemawchen enkawl a nih hnuah zanin dar 9:0 vel khan a boral ta a ni.
A ruang hi naktukah Mizoram lama rawn haw chhohpui tumin tunah hian Max Hospital-ah tihfel ngaite buaipui mek a ni a, ruahman dan anga thil a kal theih chuan naktuk (22.7.2025) zing lam thlawhnaah rawn phurh haw tum a ni a, Aizawl Phunchawng Venga an chenna in-ah naktuk zanah lumen a ni ang a, Nilaini-ah vuina hun hman a ni ang.
Lalrintluanga Sailo hi Lalnguauva Sailo leh Lalbiakthuami-te karah June ni 13, 1960 khan Aizawlah a piang a, kum 16 mi chauh a nih laiin MNF zawmin a rammu a, kum 1986-a remna ziah a nih khan rawn chhuak ve-in, kum 12 chhung zet a zawnin VC member atan thlan tlin a ni a, kum 2018 khan MNF ticket-in Dampa bialah thlan tlin a ni a, kum 2023 khan Dampa bialah hian MLA atan thlan nawn leh a ni a. Lalrintluanga Sailo hi Assembly House-ah a tâl na thin hle a, a hming lemah pawh ‘Dampa Savawm’ tiin sawi thin a ni nghe nghe a ni.
Lalrintluanga Sailo hian a nupui Lalbiakthuami leh an fate 5 – mipa 3 leh hmeichhia 2 a kalsan a ni.