MZP-in NHIDCL Executive Director (ED) Virendra Jakhar chu Mizorama lo leh tawh lo turin a hriattir.
Vawiin (22.7.2025) khan MZP chuan Aizawl Press Club-ah thuthar lakhawmtute kawmin, MZP rorelna sâng ber dawttu Federal Council vawi 59-na-in “NHIDCL hnathawh hi a that tawk loh thin avangin, a that zawk theih nan MZP-in hma la chhunzawm zel rawh se” tih a rel chungchangah ni 17 July, 2025 khan NHIDCL Executive Director (ED) Virendra Jakhar sawipui an tum tih sawiin, mahse chawlh a lo lak avangin hmuh theih a ni lo, an ti.
MZP chuan Mizoram ei leh bar lakluhna kawngpui pawimawh em em, kal hleih theih loh khawpa a chhiat laia NHIDCL hotupa ber Executive Director-in August ni 7 thleng chawlh a la daih mai chu hriatthiam har an tih thu an sawi a, Mizo mipuite hmuhsitu NHIDCL Executive Director chu Mizorama awm tlâkah MZP chuan a ngaih loh bakah, a deputation term a tawp tawh avangin a term pawhsei an remti lo tih sawiin, NHIDCL ED chu Mizoram-a lo let leh tawh lo turin an hriattir nghal a ni.
Mizoram ei leh bar lakluhna kawngpui pawimawh em em, a chhiat lutuk avanga kal hleih theih loh khawpa a chhiatna lai hi NHIDCL enkawl lai a ni a. March ni 26, 2025 khan Mizoram PWD chuan Bilkhawthkir – Kolasib (Km 70-95) leh Kawnpui / Khamrang (Km 118-133) chu NHIDCL kutah a hlân tih an sawi a. (Ref. Letter No.D-10024/1/2020-PWD/NHD-Iii/32, Dated Aizawl the 26 March 2025)
Hetianga fur khaw chhiat vanglai taka, NHIDCL Executive Director-in chawlh a la hi MZP chuan mak a ti hle a, lirthei khalhtute mangang au thawm pawh engah mah ngai lo a, a ral thlir mai mai chuan Mizoram mipuite a hmusit hleah an ngai tih sawiin, riltama Mizoram mipuite thih mang vek pawh pawi an ti loah an ngai tih an sawi.
MZP chuan tun thla, July chhung ngeia NHIDCL-in an enkawl kawngpui chhe zual lai motor kal theih tura thuam tha vat vat turin a phut a, an hmalak dan MZP in uluk takin a vil dawn bakah, a tul angin a bawhzui zel dawn tih an sawi bawk.