Technical Director NHIDCL, New Delhi chuan PWD-te ṭanpuina leh traffic management ṭha tak a awm theih dawn chuan ni 10 chhunga Kawnpui leh Sairang inkar kawng siam ṭhat theih a beisei thu a sawi.
Vawiin (22.7.2025) khan Mizoram PWD leh NHIDCL hotute chu Secretariat Conference Hall, MINECO-ah Kawnpui leh Sairang inkar kawng chungchang ngaihtuahin an ṭhukhawm a, ṭhutkhawm kaihruaitu K.Lalthawmmawia, Commissioner & Secretary, PWD chuan Chief Minister thurâwn anga meeting hmanhmawh koh a nih thu sawiin, NHIDCL-in Kawnpui leh Sairang (NH6) inkar kawng an siam chu an enkawlzui ṭhat tawk loh avanga kawng a chhiat thu leh tun dinhmunah hmanhmawh taka siam ṭhat ngaia a awm thu sawiin, nitin mamawh ei tur, bungrua leh tuialhthei phur lirtheite an tlan ṭhat theih loh avanga mipuiten an tawrh nasat thu a sawi a. NHIDCL-ten kawng thawmṭhat hna an thawh chu ṭanpui turin Mizoram PWD-te ruat an nih thu sawiin, kawng chhe laite siamṭhat hna PWD department-ten an thawhpuina tur atan hian cheng nuai 100 ruahman a nih thu a sawi.
Engineeer-in-Chief, PWD pawhin thu sawiin, Mizoram PWD-te chu NHIDCL-te ṭanpui tura an inpeih reng thu a sawi a, Technical Director NHIDCL, New Delhi chuan, kawng siam ṭhat hna thawh a nih lai hian lirthei tlan dan mumal tak (traffic management) a awm a pawimawh thu sawiin, PWD-te ṭanpuina leh traffic management ṭha tak a awm theih dawn chuan ni 10 chhunga siam ṭhat theih a beisei thu sawiin, boruak chhe zual tur vênna atan Director (T) NHIDCL pawh naktukah a rawn kal nghal dawn tih a sawi bawk.
He ṭhutkhawmah hian a rang thei ang bera kawng chhe laite siamṭhat thuai a nih theih nan, hna thawh dan tur vil zui tur Kolasib DC kaihhruai Joint Operation Group din nghal a ni a, member atan PWD aṭangin Chief Engineer (Highways), Superintending Engineer (NHC-I), Sr. Executive Engineer (NHD-III), Sr. Executive Engineer (Kolasib Division) bakah Kolasib District Superintendent of Police, Sairang Police Station Officer-in-Charge, NHIDCL leh PMU, Kolasib, NHIDCL-te ruat an ni.
Chairman chuan kawng siamṭhat chu thil hmanhmawhthlak a nih avangin Joint Operation Group-te hian hna thawh dan tur an duan nghal tur thu sawiin, uluk taka vil tur leh hmasawnna thlen nghal tura a beisei thu a sawi bawk.
He ṭhutkhawmah hian Kolasib District Addl SP pawh sawm a nih angin a tel a ni.