School Education Department chuan nimin khan Directorate of School Education Conference Hall-ah school uniform inang tlang, school calendar leh school kai hun (timing) chungchangah vantlang inrawn-khawmna hun a buatsaih.
School Education Director Angela Zothanpuii chuan inrawnkhawmna hun hi hmanpuiin, thupui sawiho tur chanchin tlangpui leh inkohkhawm a nih chhante a sawi hmasa a, thupui sawiho tur chungchangah hian an department hnenah ngaihdan ziaka thehlut tawh 200 chuang an awm thu a sawi a, sawrkarin policy ṭha tak a duan dawn chuan a hmangtu turte ngaihdan hriat a pawimawh tih a sawi a ni.
Inrawnkhawmnaah hian chawhma lamah thupui pahnih – School Uniform inang tlang leh School Calendar chungchang sawiho a ni a, chawhnu lamah School kai hun chungchang sawiho a ni.
He hunah hian Department hotute bakah, Rev. Dr. K. Thanzauva, School Educa-tion Department Consultant; State Council of Educational Research and Training (SCERT); MBSE; Samagra Shiksha; I&PR Department; Higher Secondary School Lecturers Association Mizoram (HISSLAM); Mizoram Education Inspecting Officers’ Association (MEIOA); Mizoram Independent Schools Association (MISA); Mizoram Secondary School Teachers’ Association (MISSTA); Mizoram Journalists Association (MJA); Mizoram Primary Teachers’ Association (MPTA); Middle School Teachers’ Association (MSTA); Mizoram Zirlai Pawl (MZP) aiawhte leh he’ng thupui chungchanga ngaih-dan sawi duhte an tel a ni.