Khum 100 awm theihna tur Serchhip District Hospital building thar tur sak mek chungchang chu nimin khan Serchhip District Bawrhsap Paul L.Khuma hoin Serchhip DC Meeting Hall-ah sawiho a ni.
Thutkhawm kaihruaitu District Bawrhsap chuan Serchhip District mipuiten hospital thar an mamawh tawhzia sawiin, a mawhphurtuten mahni huang ṭheuhah theihtawp chhuah turin a fuih a, Central leh State-in an hmalaknate an vil reng a, bialtu MLA leh Mizoram Chief Minister ni bawk Lalduhoma pawhin hospital sak mek hmasawn dan a ngaihven reng tih sawiin, Serchhip District mipuite tana rotling, hospital ṭha tak, a rang thei ang bera sak zawh a nih theih nan ṭan la turin a chah a ni.
Serchhip District Hospital sak mek hi Block A leh Block B-ah ṭhen niin, Block A hi PGCIL CSR Fund aṭangin cheng vaibelchhe 21 senga sak mek a ni a, a sak dan tur ruangâm siamṭhat a nih avangin PGCIL pawm turin design thar hi thawn thlak mek a ni a, PGCIL hian Mizoram sawrkarah zawhna hrang hrang an neihte chu Health Department-in a chhânna a thawnfel tawh a, PGCIL hian an pawm a nih chuan thawhhona thuthlung Memorandum of Understanding an ziak ang a, MoU ziahfel a nih aṭanga chhiarin Block A bik hi thla 18 chhunga peihfel hman beisei a ni. Tun dinhmunah a chhawng hnuai ber chhuat chhun zawh tawh a ni a, 1st floor chhunna tur ban tung fel tawhin a beam chhun zawh a ni tawh bawk a, kar tawpah emaw kar thar bul lamah 1st floor hi chhûn hman beisei a ni.
PWD lam chuan hospital sak hna hi uluk takin an vil reng tih sawiin, Contractor-te bungraw hman a ṭha tawk em tih finfiahna (test) a hun takah an neih ṭhin thu leh, tun thlengin Contractor-te hian test hi an la paltlang thei zel tih an sawi.
Block B hi DoNER Ministry hnuai North East Special Infrastructure Development Scheme (NESIDS) aṭanga sak a ni dawn a, cheng vaibelchhe 50 sênna tur concept paper pawmfel tawh niin, DPR buatsaih mek a ni.
|hutkhawmah hian Directorate of Health & Medical Education (DHME) Joint Director Dr. Ruth Lalmuanpuii, Sr.Chief Medical Officer, District Medical Superintendent, PWD, P&E, I&PR hotute bakah Serchhip Town Development Committee, Serchhip NGO Coordination Committee, Serchhip Joint Action Committee leh contractor-te an tel a ni.