Nimin atang khan Mizoram Universal Healthcare Scheme (MUHCS)-a la inziaklut lote tana inziahluhna hun August thla chhung atan hawn tan leh a ni.
August thla chhunga inziaklutte hian inziahluh man pangngai lêta tam chawiin an inziahluh a ngai tawh dawn a, General plan Rs.2,500/- ni thin chu Rs.5,000/- ni tawhin, Standard Rs.5,000/- chu Rs.10,000/- a ni tawh dawn a, Premium Rs.10,000/- pawh Rs.20,000/- a ni tawh dawn a ni.
MUHCS hnuaia inziak lût tawh zingah hian chhungkaw 12,533 hi General (Rs.2,500) hnuaia in ziaklut niin, chhungkaw 1,128 chu Standard (Rs.5,000) hnuaia ziah luh an ni a, Premium (Rs.10,000) hnuaia inziak lut hi chhungkaw 605 an awm tawh bawk a ni. MUHCS inziah luh hun hi April atanga June thleng hawn niin, sawrkar chhinchhiah danin inziak lûtte hi Aizawl East, Aizawl West, Champhai, Kolasib, Lawngtlai, Lunglei, Mamit, Serchhip leh Siaha District atanga inziaklutte an ni a, MUHCHS inziah luhna atana sum lut hi a vaiin Rs.430,22,500/- a tlingkhawm tawh a ni.
MUHCS hnuaia inziak lût zingah Aizawl East atanga inziak lût tam berin chhungkaw 4,276 an inziaklût a, hetihlai hian Mamit district atanga inziaklut hi chhungkaw 194 chauh awmin inziah luh tlemna ber District a ni.