August thlaah Mayweather Vs McGregor

Boxing leh UFC ngainatuten hmuh an chak em em chu a thleng dawn ta niin a lang a, Boxing legend Floyd Mayweather leh UFC champion Conor McGregor te chu August thlaa inbei turin an inbe fel ta.
Kum 40 mi, Mayweather chuan Twitter-ah Video post-in an inbeihna hi August ni 26-ah Las Vegas-ah an nei dawn tih a sawi a, “Hei hi Official a ni,” a ti bawk.

Irish UFC lightweight champion kum 28 mi, McGregor pawhin, “Inbeihna chu neih a ni dawn ta” a ti a, Mayweather leh McGregor te an inhnek theihna atan mi pawimawh tak UFC President, Dana White pawhin ESPN hnenah, “Thil thleng thei lo tura ngaiha indawrna chu tunah chuan zawhfel a ni ta,” tiin a sawi ve bawk a ni.

An inhnekna tur hi light-middleweight a ni dawn a, boxing history-a sum tamna ber turah hian a inhnektute hian $100m (£78.4m) ve ve an hlawh dawn a ni.

Weight hrang 5-a champion tawh Mayweather hi a hun laia boxer ṭha bera ngaih a ni a, inhnek vawi 49 a hmachhawn hnuah kum 2015 khan hneh loh nei lovin boxing a chawlhsan a, hemi hma kum 2008 khan inhnek vawi 39 a hmachhawn hnuah Boxing a chawlhsan zawk a, a lo kir leh a, inhnek vawi 10 a hmachhawn leh a, a chak leh vek a ni.
A inhnekpui tur, McGregor hi Professional boxing ring chhungah a la lut lova, kum 2016 November khan UFC-ah dual-division champion a ni a, tun hma-in Mayweather hi Mixed martial arts dan hmanga insualpuiah a lo cho tawh ṭhin a, nikum December thla khan California State Atletic Commission chuan Boxing license pe-in, US-ah chuan Boxing a khel thei ta a, booxing ring chhungah Mayweather nen chuan an inbei ta zawk dawn a ni.