New Delhia cham mek Chief Minister Pu Lal Thanhawla chuan nimin khan ni 2 awh tur Jamia Millia Islamia University a khuarel chhiat-rupna chungchanga conference buatsaih a hmanpui.
Chief Minister chuan hmarchhak bial chu khuarel chhiatna tam tak lirnghing, tuilian, leimin leh thlipui lakah a himlo hle tih sawiin, lirnghing na ber thlen theihna a ni a ti a. Kumin 2016 January ni 4 a Manipura lirnghing aia nasa zawk helai bialah a thleng thei a ni tih min hriattirtu a ni a ti a.National Institute of Disaster Management a mithiamte pawhin Himalaya tlang chhuah lamah lirnghing na taka thleng thei reng a ni tih an sawi chu a tarlang a. Kum 1950 a Assama lirnghing thleng aia hlauhawm zawk a thleng ang tih hi mi te hlauh a nih thu sawiin, hma-sawnna avangin chenna in tha tak tak a pung chho nasa a, mahse heng in te hi lirnghing lakah a himlo hle a ni a ti a. Chuvangin chhiatna namenlo hmachhawn thei reng kan nih avang hian lirnghing thlen thulhah chhiatna a thlen tlem theihnan mumal taka kalphung duante, lo inralrin dan leh a tak alo thlen palha tih tur leh tih loh tur lo zir lawk a pawimawh hle a ni a ti. Disaster Management Act, 2005 a inkaihhhruaina hi zawm a, sawrkar, tlawmngai pawl leh mimal angten kan thawhho a ṭul a ni a ti.
In sak dan chungchangah hmarchhak state te hian tunlai leh pipute sak dan lakkawp a, a sak dan thuhmun hman pawimawh a tih thu Pu Hawla chuan a sawi a. RCC a in kan sa anih pawhin lirnghing laka him thei ber tura sak a pawimawh hle a ni a ti a. ‘Assam type’ kan tih ang te hi technology thar ber zel hmang chunga sak chu tha ber tura a hriat thu a sawi a. Khuarel chhiatna laka him a pawimawh avangin inzirtirna uar taka puanzar leh ‘social media’ te hman tangkai a pawimawh thei hle ang a ti. Khuarel chhiatna alo thlena a nghawng kal chho zel, mihring hriselna tichhe thei laka kan him theihna tura damdawi lam mithiamte koh zung zung an nih theina tura hmalakte, abikin thingtlang lamah a pawimawh hle a ni a ti.
Conference hian khuarel chhiatna thlen thulha mihring hriselna, rilru hahna leh buaina bakah in sak dan chungchang te ngaihpawimawh bikah a dah a. Nepal leh Manipurah lirnghingin chhiatna namenlo a thlen avanga hmarchhak bial pum leh Himalaya chhehvelte a him lohzia a tihlan avangin mipui vantlang ngaih pawi-mawh te leh kalphung mumal tak buatsaih dante sawiho a ni a. In sak danah pawh Mishing Style leh Assam Type te chu tunlai thiamna nen hmankawp a remchan dante sawiho a ni.
He conference ah hian Pu Lal Thanhawla bakah Union Minister of State for Home Affairs Pu Kiren Rijiju, Sikkim MP PD Rai leh mithiam dang ten thu an sawi a, state hrang hranga disaster management official te, hmarchhak atanga mithiam bik, zirbingna nei mekte an tel bawk.
A ni-hnihnaa thusawi tur thahnemtak zingah CYMA a CEC member Dr. Malsawmliana’n ‘Disaster Responses in Mizoram With Particular Focus on the Role of YMA’ tih thupui hmanga thu sawi tura beisei a ni bawk a ni.