Zothlifim Logo
Loading ...

Nimin khan Chief Secretary Pu Arvind Ray chuan CS Conference Room-ah ‘Mizoram Election E-Atlas Portal’ chu a taka hman theih turin chuan a hawng.

Chief Secretary Pu Arvind Ray chuan thusawiin kumin Mizoram Legislative Assembly inthlan lo awm tur atana inbuatsaihna leh inthlan hun thleng pawha \angkai tur Election E-Atlas Portal, MIRSAC leh NESAC te’n an buatsaih chu lawmawm a tih thu a sawi a. Tunlai thiamna Geographic Information Systems (GIS) hmanga sawrkar hna leh inrelbawlna awlsam leh chak zawka kalpui theih a nih tak thu leh chu chuan ram hmasawnna tam tak a thlen theih thu a sawi a. Chutiang a nih avang chuan hetiang lama thiamna neih leh hman tangkai a pawimawh thu a sawi bawk. Chumi rilru pu chunga Mizoram Election E-Atlas Portal buatsaih leh a taka hman theih a ni ta hi kan hma lawka inthlan lo awm tur atan mai bakah hun lo kal lehzel tur atan ram leh hnam tan rah tha tak chhuah se a duh thu a sawi a. Tun inthlan lo awm tur atanga sawrkar hnathawk te leh inthlan buaipuitu zawng zawngte chu tha taka an mawhphurhna hlen turin a ngen a, duhsakna a hlan bawk a ni.

Additional Chief Electoral Officer, Pu Krishna Mohan Uppu pawhin thu sawiin tun MLA inthlan lo awm tur atana inbuatsaihna kalpui a nih dan tlangpui a sawi a. Hetianga GIS thiamna hmanga MIRSAC leh NESAC bultuma Mizoram Election E-Atlas Portal buatsaih leh hman theih a ni ta chu lawmawm a tih thu a sawi a. He portal hmang hian felfai zawk leh rang zawka inthlan buatsaih leh kalpui theih ngei a rin thu a sawi bawk a ni.

He inkhawm hi Dr. RK. Lallianthanga, Chief Scientific Officer leh Member Secretary, MIRSAC chuan a kaihruai a. Hmalak dan report tlangpui pein Mizoram Election E-Atlas Portal hi Mizoram Remote Sensing Application Centre (MIRSAC) leh North-Eastern Space Application Centre (NESAC) tangkawpin kumin kumtir lam atanga an buatsaih tan a nih thu a sawi a. He portal hi tunlai thiamna sang Geographic Information System (GIS) hmanga kan hmaa inthlan lo awm tur atana a tangkai thei ang ber tura duan a nih thu a sawi a. He web portal hi a tirah sawrkar official tan chauha hman tura duan a ni a. Amaherawhchu mipui vantlang tan pawh tlawhpawh (access) theiha buatsaih a nih thu a sawi bawk.

Pu R. Lalfamkima, Scientist, MIRSAC leh Pu Nilay Nishant, Scientist/Engineer ‘C’ NESAC te chuan he portal hi a taka a hman dan tur a lem nena entirin an sawifiah bawk.

He hunah hian Election Department-a officers te leh Aizawl leh Lunglei District DC te bakah MIRSAC Scientists te leh Directorate of Science & Technology-a officers te an tel a ni.