Parliament thutkhawmah Mizoram MP pahnihten thu sawi

Parliament thlasik ṭhutkhawm neih mekah Rajya Sabha MP K.Vanlal-vena leh Lok Sabha MP C.Lalrosanga-te chuan thusawina hun an hmang.

K.Vanlalvena, MP (RS) chuan African Swine Fever (ASF) vanga Mizoram tawrhna chungchang a sawi a, Mizoram AH&Vety Department report tarlangin, Mizorama District 11-a khaw 271-ah ASF avangin vawk 29,800 an thih tawh thu a sawi a. Hri kai rinhlelh vawk 10,380 tihhlum a nih tawh bakah, heng vawk thi zawng zawngte hlut zawng hi cheng vaibelchhe 8000 vel nia chhut chhuah a nih thu Parliament house a hriattir bawk a ni.

K.Vanlalvena chuan hetiang zat laia tam mihring ran vulh thihna hi kuthna-thawktu miretheite tan chuan Disaster leh Natural Calamity a nih thu sawiin, he African Swine Fever (ASF) tuartute zawng zawng hnenah zangnadawmna pe turin Central sawrkar a ngên nghal bawk a ni.

Hetihlai hian Ningania Lok Sabha thlasik ṭhut-khawma Covid-19 chung-chang sawihonaah Lok Sabha MP C.Lalrosanga chuan Mizorama Covid-19 hripui dona kawnga theihtawp chhuahpui turin sawrkar laipui hotute a sawm a, C.Lalrosanga chuan Mizorama hripui vei kiam chak thei lo leh state dangte, a bikin hmarchhak state dangte nena khaikhinin Covid-19 kai zat a sang lam a la ni zel chu dopui turin Central sawrkar chu a ngen a, C.Lalrosanga chuan hripui chi thar ‘Omicron’ laka inveng tur leh do tura India sawrkarin thapui a chhuah ṭul a tih thu a sawi bawk.

Leave a Reply Cancel reply

This site uses Akismet to reduce spam. Learn how your comment data is processed.