Home Minister Lalchamliana chuan nimin khan Directorate of Forensic Science Laboratory, MINECO-ah Cyber Crime hnuhma chhuina tur Cyber Forensic Laboratory bun thar a hawng.
Home Minister chuan internet hmanga misualte chetna avang hian mi tam takin an pawisa khâwl sate an hloh a, an thlalak leh mimal nunte phawrh mualphoa awmin an data pawimawh tam tak misualte kutah a lut ṭhin, a ti a. Tun-hnaiah Cyber Crime kaih-hnawih pawikhawihna Mizo-ramah a hluar nia hmuh a nih thu sawiin, kum 2020 hnu lamah ringawt pawh Police station-ah thubuai 700 chuang an ziak lut a ni, a ti.
Home Minister chuan Cyber Forensic Laboratory thar hian Cyber Crime chungchanga hnu chhuinaah nasa takin sawrkar a pui thei dawn nia a lan thu sawiin, Mobile phone leh computer aṭanga thil pawimawh lâk chhuah te, nawhreh tawh lak chhuah leh thil pawimawh dahkhawmna chhe tawh aṭanga thil pawimawh lak chhuahte a theih dawn a, hnu chhuinaah finfiahna neih theihna kawngah nasa takin a ṭangkai dawn a ni, a ti.
Cyber Forensic Laboratory hi sawrkar laipuiin hmeichhiate an him zawkna tura a hmalakna lian tak Nirbhaya Fund Scheme hmanga din a ni a, India rama state 10 Pilot Project atana a thlan zinga Mizoram FSL pawh telin, Nirbhaya Fund aṭangin cheng nuai 419 a dawng a, he sum hi cyber forensic laboratory dinna atan leh DNA division tihchangtlun nan hman a ni.
Mizoram Forensic Science Laboratory hi kum 1998 a din a ni a, nimina hawn tak Cyber Forensic Laboratory hi Division 8-na a ni dawn a, 2021 chung khan pawikhawihna hmun 52 enfiahin, Case 890 leh Exhibit 6885 an endik a, heng an Case te hi Court-ah an dinpui thin a ni.