Vawiinah KTP General Conference rorel inkhawm nei dawn

Ningani zan aṭanga ṭan, KTP General Conference chu Leisekawt Field-a pandal sakah neih mek a ni a, vawiin hian Serchhip Kawnpui Kohhran Biak Inah rorel inkhawm neih a ni ang.

Nimin chawhma khan Rawngbawlna Report inkhawm neih a ni a, report-a a landanin KTP member 1,54,441 (mipa 95,729 leh hmeichhia 58,712) awmin, bial 207-ah branch 879 an awm a. Hemi hun chhung hian KTP member boral 453 (mipa 386 leh hmeichhia 70) an awm a, KTP member innei 3537 awmin, an zinga 1584 hi Biak In-a innei niin, 1953 hi hmun danga innei an ni a, Bial leh Branch KTP-in missionary an chawm zat belhkhawm hi 3828 a ni a, report hun chhung hian KTP member zingah mi 1112 chu missionary-in an chhuak a, kum 2019-2020 budget-ah cheng nuai 69.26 an neih aṭangin January thla thleng khan Rs.63,17,410 an hmu tawh a ni.

Vawiin hian Serchhip Kawnpui Kohhran Biak In-ah kum 2020-2022 chhung hruaitu thlanna neih a nih bakah rorel inkhawm neih a ni dawn a, kum 2024-a KTP General Conference vawi 60-na dawngtu tur puan nghal a ni bawk ang.

KTP General Conference vawi 58-naah hian thupuiah ‘Felna Hriamhrei’ (Rom 6:13) hman a ni a, Speaker-ah Rev. R.Lalrosiama, Field. Secretary chu hman a ni dawn a, zanin aṭangin Pathian thuchah a sawi ṭan dawn a ni.

Nimin tlai dar 3 thlenga mikhual thleng tawh zat hi 15,487 an ni a, palaite lirthei hman zat hi 2,236 a ni.

Hetihlai hian Organising Committee chuan mikhual thlengtute hautak lutuk tur chhawk zangkhai nan mikhual neite tan man tlawma buhfai lei theih turin a ruahman a, mikhual neiten Kg. 1 Rs.15/-in, mikhual pakhat tan Kg. 2 zela an lei theih turin Kohhran hrang hrangah buhfai a chhawp chhuak a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram