Tunhnaiah Biate MZP Hqrs. chuan an bial chhunga Zirtirtu indaihlohna
phuhruk tura sawrkarin zirtirtu a sawn kualte an awmna hmun tura ruat
thara awm duhlo te chu an awm ngei theihna turin an bei zel dawn tih
thuchhuah siamin an sawi a, an thuchhuahah hian an bial chhunga
zirtirtu sawn tawh an awmna hmuna awm duhlo te pawh an tarlang tel
nghe nghe a ni.
Mizoram sawrkar hnuaia zirna in hrang hrangah zirtirtu awmdan a
inrualkhai lovin, thingtlang lamah indaihlo taka an awm laiin khawpui
lamah erawh an buk hle niin sawi a ni ṭhin a, hemi chungchanga
harsatna sukiang tur hian sawrkar pawhin hma a la ngei niin hriat a ni
a, amaherawhchu tun thlengin zirtirtu awmdan hi a la rualkhai lo hle
tho nia hriat a nih bakah zirtirtu ṭhenkhat chu an awmna hmun tura
tihnaah an awm duhlo niin sawi a la ni zui zel a, hei vang hian
sawrkar hian zirtirtu sem rualna kawnga hma a lakna kha duhthu a la
sam tawklo em ni a la tih theih bakah hemi kawnga a hmalakna hi a
bawhzui ṭha tawklo em ni tih zawhna a awm thei a, hemi chungchang hi
sawrkar lam hian ennawn leh se, thingtlang zirlaiten zirna ṭha an dawn
theih ngei nan na zawkin hma la thei se a duhawm hle mai.
