Central YMA chuan General Conference-a an thu pawm tawh ‘FAINA BEIHPUI THLAK’ tih chu a kalpui ṭan ta a, Faina beihpui thlak Programme hawnnaah CYMA President chuan keimahni mai nilo kan khawlai leh kan chhehvel a bawlhhlawh leh Fai hian kan hnam nunphung leh kan changkanna a pholang a ni a ti a, a dik hle a ni.
Mizo te hi tunah chuan faina lamah hma kan sawn tawh viau a, kan taksa leh kan in te chu kan vawngfai tawh khawp mai. Amaherawhchu, kan khawlai leh puipunna hmunah te erawh faina kawnga hmasawnna tur kan la nei tam hle thung niin a lang.
Mi in a ni emaw, khawlai a ni emaw, hmun fai takah chuan bawlhhlawh te reuhte, sweet kawr ringawt pawh paih mai a inthlahrunawm a, hmunfai taka bawlhhlawh paih chu a zahthlak a, mi pangngai chin chuan kan paih mai mai ngai lo. Amaherawhchu, hmun ṭawp leh bawlhhlawh tamna hmunah chuan bawlhhlawh paih belh mai hi a inthlahrunawm miah loh thung. Chuvangin, hmun thianghlim leh fai reng chu alo bawlhhlawh deuh hunah pawh tihfai hna a hautak lova, faina hi a kal laklawh tawh chuan a hranpaa buaipui ngai lutuk lovin a kalpui reng theih a ni.
Keimahni, mihring leh kan inchhung chauh faina kan ngaih pawimawh ringawt a, kan khawlai dung leh puipunna hmun faina lam kan ngaih pawimawh si loh chuan faina khingbai a ni tih kan hriat a ṭul. Keimahni leh kan in leh a compound chhung chauh ngaihtuah a, kan bawlhhlawhin kan Compound a pelh tawh chuan midang tan leh vantlang tan hnawksak leh bawlhhlawh a ni tur pawh ngaihtuah miah lova kan bawlhhlawh te kan compound aṭanga kan thehchhuah ringawt chuan kan fai dan chu faina changkang lo leh huatthlala tak a ni ang.
Kan in leh kan Compound fai kan duh a, kan ngaih pawimawh ang bawkin kan khawlai dung leh puipunna hmun fai taka enkawl kawngah hian mipui te hian zir tur tam tak kan la nei a, kan thlen chin aṭang hian hmasawn zel tumin Faina Beihpui i thlak ang u.