State Day sawrkar chawlha puan hi

Nimin kha Mizoram State-a puan a nih champha a ni a, he ni hi sawrkarin kumtinin sawrkar chawlhah a puang a, kum dangah chuan he ni pual hian sawrkarin hun a hman loh pawhin eng pawl emaw te chuan he ni puala hun an hman thawm hi hriattur a awm \hin a, kuminah erawh chuan he ni pual hian sawrkar emaw, eng pawl mahin hun an hman thawm hriattur a awm lo a ni.

Mizoram sawrkar hian State Day sawrkar chawlha a puan chhan hi he ni a ngaih pawimawh vang hi a nih a rinawm a, chutihlaia  chawlha puangtu sawrkar meuh pawhin he ni puala Programme engmah a siamlo leh he ni puala hun hmang tumah an awm lo hi he ni hian hlut a hlawh tawklo tih a lang chiang hle.

Sawrkar chawlhah sawrkar hnathawkte an chawlh \hin avangin sawrkar hna kal lai tam tak a chawlh phah a, sawrkar hna kal lai tam tak a chawlh avang hian mipui tam takin an tuar fo \hin a, chuvangin, hetianga ni hlut hlawh ni si lo, ni puala hun hmangtu pawh awm chuang si lo sawrkarin chawlha a puang hi thil inhmehlo tak a ni a, hetianga he ni hluttu an awm lo zui zel dawn a nih chuan sawrkar pawh hian chawlhah puang tawhlo law law se, sawrkar hna kal lai a chawlh loh phah ang a, sawrkarin sum tam tak a hloh loh phah bawk ang a, chawlha puan a nih avanga tuartu mipui tam takin an tawrh loh phah bawk dawn a, State Day a nihna a bo phah dawn chuang lo.

YMA Day leh MHIP Day te pawh sawrkarin chawlhah a puang a, heng ni pual hian sawrkarin Programme a buatsaih ngai lova, amaherawhchu Day neitu YMA leh MHIP member zinga sawrkar hnathawk tam tak an tel avangin chungte chu he ni puala hun hmannaah hian an tel ve theih phah a, sawrkarin heng ni pual hian Programme siam lo mahse a hnuaia hnathawk tam takte he ni puala hun hmannaa an tel ve theih avang hian heng ni te sawrkar chawlha a puang hi thil inhmehlo a ni lem lova, chutihlaia hmangtu leh hluttu pawh awm mumal lo ni chawlha puan a ni hi kan hmasawnna tihnufumtu a ni thei tih hria-in, hemi chungchang hi sawrkar thuneitu te hian ngaihtuahzui se a duhawm hle mai.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram