Serchhip hi Mizoramah chuan Tui-ah a hnianghnar ber pawl kan ni ang kan ti ṭhin a, Amaherawhchu, mipui kan pung a, Power Supply duhkhawp hmuh theih loh vanga Tui pump theih loh leh khawl hlui tawh vanga harsatna neuh neuh te a awm avangin tunhma ang chuan tui-ah kan hnianghnar thei ta lova, tui hnianghnar taka kan dawn ṭhin avangin tui dah-khawlna ṭha kan lo insiam si lova, tun hma anga duhtawk tawka tui dawn tur kan neih tak loh avangin harsatna kan tawk chho ṭan ta a, harsatna kan tawh tak tak hma hian tui dahkhawlna ṭha kan insiam a ṭul ta hle mai.
Serchhip mipuiten tui kan tlan ber chu Tuikum lui tui, PHE Department-in khâwl hmanga a pump chhuah a ni a, PHE Department Tui Pump khawl te hi engemaw vangin chhe rup thei a ni a, khawl mai bakah pipe line te pawh nasa taka chhe rup thei a ni tih kan hriat a ṭul. Chhiatna alo thlen thulh pawha kan buai lohna tura keimahni lam kan lo inbuatsaih sa hi thil ṭul tak a ni.
Mizoram chu kan vannei a, kumtin ruahtui kan hmu ṭha a, tui dahkhawlna ṭha insiam thiam ila chuan PHE Tuisem ring lo pawh hian kumtluanin kan khawsak theih a rinawm a ni. Amaherawhchu tuna kan dinhmunah chuan mipuite hi PHE Tuisem-ah kan innghat lutuk a, Fur lai pawhin chawlhkar khat tuisem theilo ta se tui-a harsatna nasa tak tawk nghal tur kan awm nual niin a lang. Chuvangin heng chhiatna lo thlen palh pawha nasa taka kan buai nghal lohna turin mipui tam zawk hi chuan tun aia tui dahkhawlna ṭha zawk kan neih a ṭul hle niin a lang.