Thingtlang zirlai te tan Career Guidance Awarness Campaign

Kumin HSLC leh HSSLC Result chhuakah kum dang ang bawkin thingtlanga zirlai te aiin khawpuia zirlaite an tiṭha filawr leh hle a, hetianga thingtlang zirlaiten khawpui zirlaite an tluk loh ṭhinna chhan hi tam tak a awm thei ang a, chung zingah chuan thingtlanga zirlaite hian tum mumal tak an neilo ṭhin niin a lang a, chuvangin thingtlanga zirlaite hian tum mumal tak an neih theihna turin kaihhruaina mumal tak pek an mamawh hle niin a lang.

Khawpui-ah chuan mi fing leh thiam an tam a, lehkha zir sang bik vaklo te pawhin heng mi fing leh thiam zawkte hnen aṭang hian thil zir tur hrang hrang leh a zir dan tur kailawn hrang hrangte pawh an hre thei a, an faten an nih duh leh tum te an sawiin, ‘Chumi nih i tum chuan…. chumi lamah chuan i kal a ngai a. Chu mi pawlah chuan mark chutiang zat tal chu i hmuh a ngai’ tiin an hrilh thei a, an nu leh paten an hrilh lo a nih pawhin an ṭhiante leh midang te hnen aṭangin awlsam takin an hre thei a, hei vang hian zirlai naupang te te te pawhin tum fel tak nei ran chunga lehkha an zir ṭhin a, an tum ram panna kailawn chiang taka an hriat ṭhin avang hian tui takin lehkha an zir theih phah a, zirnaah pawh hma an sawn phah ṭhin niin a lang.

A tlangpuiin, thingtlanga chengte hi chu zirna lamah pawh sâng lem lo, mawl mang ve tak takte an ni hlawm a, chuvangin zir tur hrang hrang leh a zir dan turte pawh an hriat loh bakah an fate nih tum leh duh te pawh a zir dan tur leh a kailawn chiang takin an hrilh hre thei lo fo a, chuvang chuan zirlaiten an nih tum an nih theihna tur kailawn pawh hre mumal mang lovin mawl mang tak takin lehkha an zir ve mawp mawp a, hetiang hi chuan zirlaite tan pawh lehkha zir tui har a, chuvangin thingtlang zirlaite hian khawpui zirlaite hi an pha lo ṭhin niin a lang. Chuvangin, thingtlanga zirlaite chawikanna atan hian thingtlang zirlaite hnenah hian Career Guidance Awarness Campaign mumal leh ṭha zawk pek a ṭul niin a lang a, sawrkar lam aṭanga tih a nih loh pawhin Zirlai pawl lam tal chuan hma la thei se a duhawm hle a ni.