Inrinni khan Serchhip Bazar-ah Sa thianghlim lo nia hriat zawrh chhuah niin, engemawzat hralh chhuah a nih hnu-ah chauh he sa zawrh hi tihtawp a ni a, he sa hi a leitute zingah lo chhum hman te pawh an awm a, mahse a thianghlim loh thu sawi a nih hnu-ah engemawzat chu thleng lêt leh a ni a, hetihlai hian he sa thianghlim lo hi engtia tih riral nge tih hriat zui a ni lo a ni.
Aizawl-ah chuan sa zawrhnaa zawrh tura sa talh tur hi Vety Doctor-ten an enfiahsak hmasa phawt a, sa hrisel talh tur neite hnenah chauh certificate an pe chhuak ṭhin a, hei hi mipuite tan a him em em a, thianghlimna kawnga kan hmasawnna pawimawh tak pakhat a ni bawk a ni.
Serchhip-ah erawh chuan chutiang a ni lova, sa zuartuten eng sâ nge an talh tih hriatpuitu an awm lem lova, ran hrisel nge, natna nei an talh tih hriatsak theih a ni lova, sa thianghlim lo pawh zawrh chhuah theih niin, engemawzat hralh theih a ni tih a chiang ta reng mai a, sa sertute ran talh tur enfiahtu an awm ve miau loh avangin mipuite tan Serchhip Bazar aṭanga sa lei hi a him ta lo hle a, chuvangin, Serchhip mipuite hian ngaihngam taka Serchhip Bazara sa kan lei ve theihna turin Aizawl lama an tihdan ang hian sa talh tur te hi endik hmasak tir ve dan kan zawn a ṭul ta hle a ni.
Serchhip Bazarah hian Inrinni-ah lo phei chuan sa tam tak talh a ni ngai lova, chuvangin sa talh tur endik hmasak hi thil hautak tur niin a lang lova, mipui ten sa thianghlim chauh kan ei theihna tur atan leh mipui hriselna ngaihtuahpui chungin Sa talh tur endiktu tur hi Serchhip-ah hian dah ve ni se.
Tin, Bazar hmun ni lo, hmun ṭhenkhat, a bikin kawngpui dungah sa zuar hmuh tur an awm leh zauh ṭhin pawh hi khawpui tiṭawptu a nih bakah mipui hriselna atana ṭha lo thei thil a nih avangin hetianga kawngpui dunga sa zawrh hi thuneitute lam hian khap thei se, tin, a ti ṭhin te pawhin kan khawpui hmel lo mawi zawkna atan leh khawtlang hriselna ngai pawimawha kan chin zui loh a ṭha khawp mai.