Hawrawp dik hman uar ang

Khawvel ṭhang chho mekah khawl hmanga inbiakpawhna kan hmang nasa hle a, ṭawngkaa inbiakpawhna ai mahin thu (text) inthawna inbiak pawhna kan hmang nasa ta a, SMS mai ni lo, Internet kaltlanga hman chi – Facebook, Whatsapp, Telegram, Hike leh a dang tam tak te hi kan hmang nasa a, ziak leh chhiar thiam zingah chuan hetiang hmang lo hi a tlem zawk an ni tawh âwm mang e tih tur a ni ta a ni.

Heng thu (text) inthawnna kan hmannaah hian kan thu ziak (type) dan erawh kan uluk lo a, hawrawp diklo pui pui hmanga thumal ziak / type ṭhin hi kan tam zawk emaw tih tur a ni a, ṭhenkhat thu chhut phei chu tam tak tan a awmzia hriatthiam har khawpa hawrawp diklo hmang nasa an ni a, heng hawrawp diklo hmang ṭhin tam tak zingah hian an hman diklo nasat avanga hawrawp dika ziak ṭha hlei theilo pawh an awm nual tawh a ni.

Hawrawp dik lo kan hmang nasa lutuk hi a hmangtu te tan a pawi a, a chhan chu hawrawp diklo an hman nasat avangin a dika ziak ngei ngei a ngaih hunah pawh a dikloa ziah mai an awl bik a, chu chu an tan a pawi hun a awm ṭhin a ni.

Hetianga hawrawp diklo kan hman nasat chhan hi a bul chu kan thatchhiat vang a ni a, thumal ziak pum mai tur kha a tawi zawnga ziak kan tum tlat avangin hawrawp kimlo-in kan type ṭhin a, mahse a lo rei a, thumal type dikloh kan ching telh telh a, hawrawp inzat reng pawh a tawi zawnga kan ziak duh vang ni chuang lovin thumal kan type tum hawrawp zât chiah tho-ten hawrawp diklo-in kan type ta fo mai a ni.

Hetianga hawrawp dikloa message thawn chhuah fo hian kan thatchhiatzia leh kan pawlawhzia a tilang a, chumai bakah kan Mizo ṭawng a tihdal phah a, ṭhangthar lo awm zel tur te tan hawrawp dik zawk hriat har khawpin kan siam ṭhin a ni.

Thu (text) hmanga kan inbiakpawhnaah hian hawrawp dik tak hmanga thumal hrang hrang ziak / type hi kan uar deuh deuh a ṭul hle a, ziak zawm leh zawm loh tur zawng zawng te chu tihdik vek a har a nih pawhin a spelling tal hi chu tidik tura ṭan kan lak a ngai tak zet a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram