Zothlifim Logo
Loading ...

Tun thla, February thla tir khan Aizawl khawpui-ah MZP chuan hnamdang ILP nei lo leh dan lova hnamdang sumdawng dap chhuah beihpui an thlak a, hetah hian hnam dang ILP nei lo leh fello 37 leh dan lova hnamdang sumdawng 5 lai an man chhuak a ni. Aizawl bakah hmun danga hnamdang ILP nei lo leh ILP hmang diklo mai bakah dan lova hnamdang sumdawng dap chhuah beihpuithlak a nih apiangin man chhuah tur an awm ziah hi chu thil ngaimawhawm tak a ni.
Nikum khan Aizawl khawpuia tlawmngai pawlin hnamdang ILP neilo an dap chu duh lovin Assam ram chhungah Mizoram panna kawngpui an dang chat a, hemi hnu hian Mizoram sawrkar chuan tlawmngai pawl ten hnamdang ILP nei leh nei lo an dap theih loh thu thuchhuah siamin a sawi zui a, hemi hnu hi chuan tlawmngai pawl te hian tun hma angin ILP neilo dap beihpui hi an thlak ngun ta lo deuh niin a lang a, beihpui an thlak chhunah erawh man chhuah an awm reng thung a ni.

Ram leh hnam humhim duhna avanga Tlawmngai pawlten ILP neilo leh fello an dap hi dânin a phal loh thil a ni a, chutihrualin dan bawhchhia te zawn chhuahna kawnga an tha thawh te erawh ram leh hnam vei mi te tan chuan thil lawmawm tak a ni thung a ni.

Hetihlai hian Zirlai pawl ni kher lo, tlawmngai pawlten dân bawhchhia zawn chhuah an tum a nih pawhin dân bawhchhe lo zawngin, fing leh fel zawka dan bawhchhia te zawn chhuah dan kawng hi zawn ṭhin nise a finthlak hle a, dan bawhchhia zawnchhuah tumna-in buaina leh harsatna dang a nghawng palh pawh a hlauhawm lo zawk a ni.

Chutihrualin, dân ang thlapa chêt la theitu lamte  hian hnamdang ILP neilo leh ILP diklo taka hmang leh phalna nei lova hnamdang sumdawng te dap chhuah beihpui hi tun ai hian thlak ngun thei zawk se a duhawm khawp mai.