Zothlifim Logo
Loading ...

Nimina Aizawl-a PHE Department Review Meeting-ah PHED Minister chuan Aizawl-a SMS hmanga tuisem hun tur inhriattirna avangin mipui an lâwm tih sawiin, Aizawl aia changkanga Serchhip Division-in an kalpui chu lawmawm a tih thu a sawi a ni.
SMS hmanga tui sem inhrilhna hi Aizawl dawtah Serchhip-ah kalpui a ni a, Mizoram hmundangah kalpui a la ni lova, chutah pawh Aizawl aia changkangin Serchhip-ah kalpui a ni tih Minister meuhin a sawilang hi Serchhip mipuite tan pawh thil lawmawm tak a ni.

Nimina PHED Minister thusawi aṭanga thil lo lang chiang em em District dang chu sawi loh, Mizoram khawpui ber, Aizawl ai hian thil tam taka ṭhat zawkna kan nei thei tih hi a chiang a, chutiang ang bawk chuan Mizorama District dangte entawn tur hian a ṭha zawngin hma hruai theihna leh an entawn tura kal tur hian thil tam takah Serchhip mipuite hian theihna kan nei tih hi a lang chiang hle a ni.

Thil tam takah hian Aizawl emaw, keini aia District Hqrs. ni hmasa zawk te kal dan leh tihdan phun te kan entawn fo a, hei hi thil pawi a ni lo a, thil ṭha lam a nih phei chuan kan tih ngei ngei atana thil ṭul tak pawh a ni reng a ni.

Chutihrualin, kan rilru-ah hian heng khua te hmakhalh leh an entawn tur thil tih chin chhuah hmasak tumna thinlung hi kan pu tawklo deuh niin a lang ṭhin a, anni aia indah hniam deuhna rilru te hi kan pu ṭhin niin a lang. He rilru hi kan paih a, keini aiin an ṭha zawk vek bik lova, anni aia ṭhatna leh theihna nasa zawk neihna tam tak kan nei tih hria a, District danga an la tih ngai loh thil ṭha tam tak tih tur leh Mizorama hmahruaitu leh District dang te entawna kal theihna tur tam tak kan nei tih kan hriat a, chung te chu hai chhuak tura kan rilru kan siam hi a ṭul hle niin a lang a ni. District dangte aia indah hniam bik lova anmahni hmakhalh tumna rilru kan pu thei a nih chuan Serchhip khawpui hian tun aia nasa zawkin hma a sawn theih ngei a rinawm a ni.