Zothlifim Logo
Loading ...

Tunhnai khan Tuikum leh Tuichang lui-a nungchate chu tûra hrai an ni tih hriat a ni a, heng lui dunga sangha mai bakah chakai, kaikuang leh nungcha dang te engemawzat an thi a, heng tûra nungchate hraina hmun hi P&E Veng Branch YMA leh Keiṭum Branch YMA ten an humhalh huamchhunga mi a ni nghe nghe a ni.
Hetianga a khât tawka kan lui dunga nungchate tûr hmanga hrai an ni fo mai hi a pawi hle a, kan lui dung nungchate nasa takin a suat rêm a, ngai awh leh tur chuan kum engemawzat nghah a ngai ṭhin a, chu mai a ni lova, heng tûra hrai hlum sa ei hian nasa takin mihring hriselna a khawih avangin tûr hmanga kan lui sangha leh nungcha dangte man hi thil pawi tak a ni a, hetiang thil thleng hian siamtu-in kan nunphung inbûk tawk tura a duan hi nasa takin a tihdanglam phah a, hei hian nungcha dang leh mihring nun phung hi a ṭha lo zawngi nasa takin a nghawng phah a, hetianga tûr hmanga nungcha hrai chingte hian ram leh hnam pawi khawihna nasa takin an khawih a ni.

Hetianga tûr hmanga nungcha te hrai hi YMA-in a khap a ni lova, sawrkar phalloh thil a ni a, YMA mai bakah sawrkar pawhin phalloh a nih thu nasa taka an tlangaupui ṭhin mai bakah a ṭhatlohzia inzirtirna pawh nasa takin a kalpui a, heti chunga hetianga tûr hmanga nungcha lo hrai lui duh te hian pawi an khawih tih hi an inhre reng chungin hetiang thil hi an ti ngei tih a chiang a, chuvangin heng pawikhawihtute hi zawn chhuah a, an phu tawk hremna pek ngei hi an phu a ni.

Pawi khawihtu zawn chhuah loh leh hremna pêk an nih ṭhin loh avang hian midangte pawikhawih turin ngampatna a pe ṭhin a, chuvangin hetianga pawi khawihtute hi hremna pe ngei tura zawn chhuah hi thuneitu lam hian tum ngei se a duhawm khawp mai.