Ram tihkan pawizia hi in hrilh fo a ṭul

Tunlai chu kângmei vên ṭul hun chho a ni a, kum dangah pawh tun ang hun chho hi kan ram kan nasat ṭhin lai tak a nih avangin fimkhur a ṭulzia hi inhrilh tam lua a awm thei lovang a, a khât tawka kan rilru-a chawh nun thar reng hi kângmei vên kawnga thil ṭul tak pakhat ni ve-in a lang.
Kan ram tana ṭha si lo, kan la thlah hleih theih si loh chu tlangram lo neih hi a ni a, heng kan l thar tur te hi a hâl a hun chho leh dawn ta a, lo kan hâl a nih pawhin sawrkarin kangmei a chhuah lohna atana min ngen ang ngeiin kan vah bâk ram kan tihkan loh nan mei lam ṭha leh zau taka kan sial hnu pawha fimkhur taka kan hâl a ṭul takzet a ni.

Kan vah bâk ram kan tihkan hian pawi a khawih nasa ṭhin hle a, kan ram rohlu tam tak a kâng chhia a, thing leh mau tam tak kâng chhia-in kan ramngaw min tihchereu sak a, chu chuan ramsa leh sava te chênna tur leh an chaw ei hmuhna tur tam tak a tichhia a, ram dangah min pembosan fo ṭhin a, hei mai bakah lei tiṭhatu changpat leh mitlawnga hmuh tham loh rannung tereuh te te a kan hlum avangin kan rama thil chin te a hlawk loh phah fo a ni. Hei mai bakah hian nungcha dang tam tak leh kan ramhmul damdawi hlu tak tak te a kâng chhe fo a, ram kângin kan ram ngaw te min tih chereu sak avang hian kan lui tui te pawh a tlem phah zel bawk a, chuvangin ram kâng hian kan tana thil ṭha aiin kan tana thil ṭhalo hi min thlen nasa zawk tih hi kan hriat thar leh pawh a ṭha takzet a ni.

Chuvangin mitinte hian kan ram te kan tihkan loh hi kan tan a ṭha zawk tih kan hriat tlan a, ram tihkan loh mai bakah ram kâng a awm pawha ṭhelh mih zung zung hi kan tihtur, kan tana thil ṭha a ni tih kan rilru-ah kan vawn reng a ṭul a. A pawimawh berah chuan ram kal mi leh lo nei miten ram tikâng lo tura kan fimkhur ṭheuh a pawimawh a, kangmei alo chhuak palh a nih pawhin a ṭhelh hi kan mawhphurhnaa kan ngaih ṭheuh a ṭul hle bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram