School Session thar atan tunlai hian School ṭhenkhatin Admission an hawng chho leh ṭan mek a, hetihlai hian Admission Fee leh Monthly Fee chungchangah sawi neuh neuh a awm mek a, Admission Fee leh Monthly Fee hi School hrang hrang hian an duh zat zat an bituk niin a lang a, kum 3 kalta aṭanga kumtina Monthly Fee tisâng ziah School te pawh an awm nia sawi a ni.Private/Kohhran enkawl chu sawi loh Sawrkar School te ngei pawhin Admission Fee leh Monthly Fee an duh zat zat an la ṭhin tih sawiin Zirlai pawlte pawhin hemi chungchang hi sawrkarah an lo thlen tawh ṭhin a, hemi chungchangah hian Mizo Students’ Union (MSU) leh sawrkar pawhin inremna hian an lo siam tawh a ni.
Chuta an inremnaa an ziak zingah chuan “Mizoram sawrkarin permission a pek school zawng zawngte’n academic session 2014-15 aṭangin zirlaite hnenah admission fee leh fee dang an lak dawnin sorkarah (School Education department) phalna an la hmasa vek tur a ni,” tih leh, “Mizoram sorkar hnuaia recognised private school (aided) higher secondary, secondary leh elementary ten academic session 2014-15 aṭangin zirlaite hnenah admission fee leh fee dang an lak dawnin sorkarah phalna an la hmasa vek tur a ni. School Education department hriatpui loa fee late chungah hremna lekkawh a ni ang,” tih te a tel a ni.
Hetiang hian sawrkarin zirlai pawl te inremna alo siampui tawh avangin zirlai nu leh pa te pawhin Admission Fee leh Monthly Fee tisâng nia sawi School te hian sawrkarah phalna an la hmasa em tih chian ila, sawrkar phalna nei lova an duhthua an lo tisâng ve ngawt a nih chuan sawrkarah thlen ila, tin, sawrkar lam pawh hian School Admission tih a hun chhoh lai hi chuan School hrang hrang te fee lak dan enpuiin mipui phurrit lutuk thlen lo tur ngaihtuahpui chunga School ten fee an bituk dan pawh a enpui a ṭha khawp mai.