Mipui mamawh phuhruk dan tur ngaihtuah ni thei se

Serchhip damdawi ina Surgeon chu Lunglei lamah sawn a ni a, a thlaktu tur hi Kolasib damdawi in atangin rawn sawn tum a ni a, hetihlai hian Kolasib MZP-te chuan he Surgeon hi a chhuah phal lovin an dang mek a ni.Doctor chauh ni lovin, sawrkar hnathawk dan te pawh an aiawh tur dah an nih lohvin an chhuahsan tur khaw mipuiten an lo dang fo tawh thin a, hetiang hi Mizoramah thil thar a ni lem lo a, a bikin Doctor leh Zirtirtu sawn chhuah tur hian dan an hlawh deuh bik niin a lang a, chu pawh thingtlang lamah a hluar deuh bik niin a lang.

Doctor leh zirtirtu hi thingtlang apiangah an indaih lo niin a lang a, sawn chhuah an nihih an aiawh tur dah nghal thin an nih loh avangin dan an nih phah thin niin a lang a, hei vang hian sawrkar hian Doctor leh zirtirtu sem rual danah hian hma a la mek chungin tun aia nasa zawk hian Doctor leh zirtirtute sem rual dan tur hi a ngaihtuah a ngai a ni. Sawrkar Officer dangte pawh thingtlang lamah a inchhâwk deuhin sawn kual an ni thin a, hmun kilkhawr leh thingtlang deuhah te hi chuan zirtirtu te pawh hi awm hun chhung tur hun bituk nei deuh te hian dah dan te pawh ngaihtuah se, Doctor te pawh hi District Hospital-ah tal hi chuan mipui te mamawh phuhruk tur leh specialist te kim deuha an awm theih dan tur ngaihtuaha a inchhawk deuha awmtir dan te pawh hi ngaihtuah thei se a duhawm khawp mai.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram