Zothlifim Logo
Loading ...

Kum 20 chhung zet Zofaten rambuai vanga tawrhna nasa tak kan neih hnuah mipui leh kohhran te ngenna leh, MNF hotute leh kan ram hruaitute ṭhahnemngaihna avangin kum 1986 June ni 30 khan MNF leh India sawrkar chuan Inremna Thuthlung an ziak ta a, he remna kan neih hlutzia hi rambuai lai a tak ngeia tawngten an hrechiang hle ang a, rambuai hrehawm leh manganthlakzia hre phak lo te tan chuan Zofaten Remna kan neih hlutzia hi hre mahila thûk zawkin kan hrethiam kher âwm love!!
Remna kan neih hi a hlu a, Zofaten kan ṭangkaipui hle bawk a, hmasawnna tam tak kan neih phah a, Democracy rama awm chung si a rambuaina hmuna awm tam takten zalenna chanvo an neih pawh hmang ṭha thei lova an awm te, an duh anga an ram hmasawnna hna pawh an thawh theih loh lai a, keinin zalenna famkim nei a, duh duh dana awm a, duh duh thil kan ti thei ringawt pawh hi a hlu a, he ramna hi kan ram hmasawnna atan thil ṭangkai tak pawh a ni reng a ni.

Remna tluantling kan neih hi Zoram mipuite tan a hlu a, chhawr ṭangkai viau mahila tun aia nasa zawk hian kan la chhawr ṭangkai theih a rinawm a, kan ramah remna a awm avangin ram dang aṭangin kan rama hnathawh chakin ram dangmi tam takin kan ram an rawn pan ruih ruih reng a, ramdang miten hna an thawh châkna ram kan ni hi kan rama remna awm hlutzia a tilang chiang viau a, hei hian kan rama awm hi a thlamuanthlak tih a tilang chiang hle a, hemi hi kan hman ṭangkai thiam chuan kan ram hian sum leh pai tam tak hailuh nan kan hmang thei niin a lang.

Chuvangin, remna kan neih dana politics hmanga inchirh theh a, hun kal tawha thu inchuh neia buai buai lo hian remna leh muanna tluantling kan neih hi kan ram leh hnam tan tun aia nasa zawka hman ṭangkai dan tur ngaihtuaha rilru seng tur leh remna leh muanna vawng him zel tura ṭan kan lâk hi thil ṭul zawk niin a lang.