Kolasib District Hospital-a Sugeon Doctor sawn chhuahna Order sût tura sawrkar phûtin tunah hian Kolasib chuan an khaw paltlangtu National Highway-54 chu an dang mek a, NH-54 an dan bakah hian vawiin aṭangin an District chhunga State pawn panna kawng dang te pawh danchah leh an tum niin sawi a ni.
Thingtlangah Doctor leh Zirtirtu indaihlohna a nasa hle a, sawn chhuah an nih dawnin an chhuahsan tur mipuiten boruak engemaw an siam ta zeuh zeuh a, tunhnai maiah Champhai-ah phei chuan Naupang Doctor ngiat vangin lirthei te pawh hâl niin, sawrkar bungrua te pawh suasam a ni hial a nih kha.
Tunah Kolasib-in Doctor ui beh tumin Mizoram mipuite châk lâkna kawng ber chu an dangchat leh ta hmiah mai a, ni 2/1 a ral leh hnua kawng an la dang zui zel a nih chuan Zoram mipuite chuan eng kawng kawngah emaw chuan harsatna kan tawk chho nghal mai dawn niin a lang a ni.
Hetianga engemaw thil avanga sawrkara lungawi lohna kan neih châng te, sawrkar laka lungawi lohna lantir hun te a awm chang hian mahni lam chan chauh kan thlir hian thil pawi leh dem kan hlawh thei a, chuvangin hetiang hunah hian sawrkarna vawnfung chelhtu ni ila engtinnge lai takin ro ka rel theih ang tih ngaihtuahna te pawh kan hman a ṭul ve ṭhin a ni.
Hetihrual hian sawrkar thuneitute lam pawhin thingtlang mipuite dinhmuna ding tura an indah chhin ve te pawh a ṭul a, thingtlanga khawsa ta ila, thingtlangah chêng ta ila…. tih rilru pu chunga thingtlang mipuite tan pawha rorelna an kalpui hi thil ṭul tak leh kan mamawh mek niin a lang bawk a ni.