Tunhnaia Statistics Day hmannaah Statistics chu sawrkar inrelbawlna leh ruahmanna hrang hrang siamna atan a ṭangkai thu leh, statistical data lakkhawm ṭhat leh ṭhat loh te, a dik leh dik loh ten a ṭha zawng leh a chhe zawngin sawrkar inrelbawlnaah nghawng lian tak a neih thu tarlan a ni.
Data lakkawm hi a pawimawh hle a, sawrkar Policy leh plan siam dawnin an innghahna hmasa ber chu statistical data hi a ni a, data lakkhawm a dik leh dik loh hian policy leh plan siam hlawhtlin leh hlawhtlin loh tur thui takin a hrilh a, chuvangin Statistical Data lakkhawm kawngah hian fimkhur taka kalpui a ngai a ni.
Sawrkar department hrang hrangte hian data an hrang hrang lakhawmin an chhinchhiah ṭhin a, Department-a thawktu ṭhenkhatten data dik an ngaih pawimawh viau laiin, ṭhenkhat zingah data dik taka lakkhawm ngai pawimawh tawh lo leh data pawimawhna hre tawk lo a awm theih a, chuvangin department ṭhenkhat hian data dik lo deuh te pawh an nei theiin a rinawm. Data lakkhawm leh chhinchhiah ṭhat hian an hnathawh ṭhat leh ṭhat loh te, kan hna thawh hlawhtlin leh hlawhtlin loh thui tak a hril theih avangin data lakkhawm leh ṭha taka chhinchhiah hi sawrkar hnathawk te hian kan ngaih pawimawh a ṭul hle a ni.
Sawrkar department data neihsa te hi sawrkar hmalakna mai bakah mipui leh pawl ṭhenkhatte pawhin ṭangkai taka an hmang ṭhin a, sawrkar hmalakna ni kher lo, pawl leh mimal-in hma kan lak dawn pawhin kan hmalakna kawngah data behchhan chunga ruahmanna kan siam a, data mumal tak behchhen neia hma kan lak chuan kan hmalaknaah hmathlir neiin kan kal thei dawn a, data behchhana hmalak kan thiam chuan mimal eizawnna kawngah pawh ruahmanna ṭha tak a siam theih avangin statistical data behchhana hmalak dan te pawh hi kan intihhmuh a ṭul hle a ni.